有一首因情人節日而推出嘅廣東歌，有句經典歌詞係「二月十四的約會，這個日子掛念誰」，講到情人節，大家最掛念、最想同佢一齊嘅人，當然係自己情人；但世間上有一種愛，叫大愛，可以令人暫時離開自己所愛，為社會獻出大愛、無私。廣男今日喺網上睇到幾對內地情人嘅故事，佢哋因為疫症而被迫「分離」，但亦因為疫症而發現彼此更愛對方。
有一天 走到世界邊端
網上一個名為「石頭媽媽」對抗肺炎嘅故事，每日有過20萬粉絲一直關注，故事主角係武漢急症科護士，喺抗疫期間，佢自己亦不幸被感染，佢嘅老公「海棠」堅持同佢一齊喺屋企隔離治療，「海棠」每日都會全副武裝去太太房間消毒，每日亦都只係有呢段時間，「海棠」先有機會見到太太；雖然喺同一屋簷下，但「海棠」每日只可以透過微信關心對方。有一日，「海棠」叫「石頭媽媽」出嚟食飯，「石頭媽媽」本來好嬲，但一開門，原來門前已經放咗一束花同一個蛋糕，原來當日係佢哋結婚四周年紀念日，「海棠」仲寫咗張字條比太太，寫住「待你痊癒，待疫情消除，憑此字條，我帶你去這地球上的任何地方，愛你」。
沒有酒席的「婚禮」
感人的故事，當然唔止一個，今年大年初八，本來係王玥玲同秦篤山嘅大婚日子，但因為佢哋一個係醫護前綫，一個消防人員，佢哋只可以各自堅守崗位；為咗唔會有遺憾，兩人決定透過視頻結婚。女主角王玥玲「婚紗」係一身粉紅色護士服，「頭紗」係深藍色防護帽，「面紗」係淺藍色口罩；至於男主角秦篤山嘅「禮服」，則係一身消防服，兩人喺院長嘅見證下成婚，朗讀「無論貧窮或富貴，健康或疾病 …」都相愛一生嘅誓詞，婚禮雖然只係短短五分鐘，但比其他豪華、典雅的婚禮，更感動、觸動人心。
有人能夠喺疫症中成婚，有人就要等待疫症結束，再同愛人共諧連理。90後護士陳穎原本約好同男友喺2月14日證婚，但大年初一佢被緊急召回醫院培訓，培訓結束第二日，就要同病毒病人「零距離」接觸，男友得知後當場痛哭，但陳穎表示「既然選了這份職業，這時候總有人要站出來」，講完呢番說話，就去醫院抗疫。入咗隔離病房11日，兩人終於有機會見面，不過係隔住玻璃門對話，兩人只能隔住玻璃互相問候、「親吻」，佢哋約定好，等陳穎由隔離病房「出嚟」，第一件就要同男友領證結婚。
珍惜眼前人
今年情人節，令好多人特別有深刻體會，疫症、病毒可以傷害人嘅身體，但無論病毒幾強，佢都「殺唔死」、「阻唔到」人與人之間嘅愛。喺呢度，廣男祝願大家情人節快樂，謹記要珍惜眼前人！
圖片來源：《小時》視頻截圖
請Follow我們的YouTube頻道：
下載我們的手機應用程式，收看第一手精彩內容：
評論