前排稱要籌款支援抗爭者嘅「星火同盟」涉嫌洗黑錢案轟動全城，唔少人除咗質疑「星火」嘅帳目往來，尤其關注點解「星火」會有資金用嚟買投資性嘅保險產品，仲要受益人係「個人」。到噚日，警方又就一宗毒品交易案進行拘捕，其中一個被捕人，竟然曾經同「星火」相關嘅空殼戶口有關係，該名青年涉嫌參與販毒加洗黑錢。睇到呢單新聞，囍雨真係好多「黑人問號」，到底呢單嘢，同「星火」有冇關係？會唔會有人用「星火」嘅錢買毒品？

千絲萬縷 均涉犯罪

呢單案嘅案情有啲複雜，囍雨睇過唔同報道，認為件事可以理解為「星火」涉嫌洗黑錢，一名青年就收咗「星火」相關嘅空殼公司4.8萬元，而呢名青年最近就牽涉一宗毒品交易案，警方亦喺佢或者同佢交易嘅人身上搜出毒品。睇到呢度，囍雨就喺度諗，到底係呢個人牽涉入黑錢、毒品案，定係連「星火」都牽涉其中呢？

對於呢單疑案，囍雨覺得警方第一件事要做嘅，就梗係呢單毒品交易案本身啦，如果有人涉嫌販毒，一定要依法追究；第二個問題，就係呢件事同「星火」有冇關係，例如涉事青年，到底佢係用「自己錢」販毒，定係用「星火」嘅錢販毒？如果係後者，咁大家又要問下，除咗黑錢案，販毒案仲「星火」又有冇關係？以上嘅問題，甚至「更多」嘅問題，警方一定要追查清楚，因為依家除咗涉及販毒，仲可能涉及有人用眾籌所得金錢從事不法活動！

「星火」紀錄不良？

老實講，囍雨本人對「星火」實在無乜好感，除咗佢涉及洗黑錢案同埋用眾籌所得金錢買「個人投資保險產品」外，囍雨仲記得警方果時行動拘捕佢哋啲骨幹，又搜到裝備又搜到超市現金券，果時已經有人懷疑佢哋係用資金、物資「支持」甚至「資助」黑暴運動，依家又嚟一單同相關空殼戶口有金錢來往嘅人涉嫌販毒，囍雨對「星火」嘅印象仲差！不過點講都好，囍雨唔敢話販毒案一定同「星火」有關，只係囍雨暫時睇案情唔排除有呢個可能；而無論「星火」涉及一單、兩單或者更多單刑事案，大家都應該要認清，好多時政客或者反政府人士籌款，帳目多多少少都有啲疑問，例如帳目「公開、透明」嘅「6.12基金」，咪又係將部分資金資助自己友「搞活動」，市民捐款前，真係要諗清諗楚！ 

圖片來源：文匯報

請Follow我們的YouTube頻道：