醫護又有工業行動？可能會罷工？怠工？聽到呢啲醫護又想發起行動嘅消息，真係會令人「震一震」，不過睇真啲今次話要發起工業行動嘅「護士協會」搞邊科，原來所謂「工業行動」，只係叫醫管局回應有關抗疫物資嘅訴求，否則佢哋就會叫打電話去「協會」熱線「舉報」，再等「協會」向局方反映？就如訪問協會主席、立法會衞生服務界議員李國麟嘅電台主持所問，到底呢班人搞嘅「工業行動」，係咩「行動」嚟？囍雨甚至質疑，呢班人係咪想搞罷工綁架病人，但唔成功呢？
想罷工 怕失敗？
雖然李國麟不斷稱佢哋唔係要罷工，但囍雨有理由相信，佢哋本身嘅「工業行動」，罷工絕對係「護士協會」嘅一個考慮行動，因為李國麟日前就向傳媒表示過，「協會亦正考慮罷工或按章工作等工業行動」，可見佢哋原來確實有罷工想法。
咁點解「協會」最後又無罷工呢？囍雨估計，當中有兩大原因，第一就係基於早前「醫管局員工陣線」嘅失敗經驗，如果「協會」依家又搞罷工，最大機會係俾市民鬧兼失敗收場；第二個原因，就係即使「協會」入面有人真係想罷工，根本連會員都未必支持佢哋，咁可能係因為「協會」絕大部分護士根本唔想離病人而去，亦可能因為護士們如果罷工要面臨處分，根本好少人願意學「醫管局員工陣線」咁，攞自己嘅飯碗、專業資格嚟「豪賭」！
李國麟拒回應是否支持罷工
所以暫時睇嚟，「協會」或者有意綁架病人以要挾醫管局，但就失敗收場。今日囍雨聽電台節目，將李國麟嘅訪問由頭聽到尾，但都聽唔到如果佢哋第一波「工業行動」無效果，到底佢哋下一步會做啲乜，所以有評論指呢種係「阿Q」式工業行動（即令人摸不著頭腦），都真係幾有道理。行動有咩實則內容同影響，睇唔到；有咩後續行動，又睇唔到；甚至連行動領袖有咩想法，都好似睇唔到。所謂支援「醫管局員工陣線」嘅行動，好可能又會爛尾收場。
喺呢場所謂嘅工業行動，李國麟近日不斷接受傳媒訪問，但囍雨到呢一刻未唔係好清楚，其實李國麟本人係咪支持罷工或者好想發起罷工；作為一個工運領導人，大家真係要問下李國麟，佢個人立場其實係咩呢？佢作為「協會」主席兼立法會議員，到底係「無立場」，定係想罷工又唔敢認先？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論