醫護工會組織「醫管局員工陣線」，上個星期以「全面封關」為訴求、口號，發動一連五日嘅罷工行動，正當大家都擔憂，呢班人臨陣當逃兵會唔會令其他堅守崗位嘅醫護人員更加「超負荷」、會唔會有病人因為缺乏照料而「出問題」時，果然就發生悲劇！日前一位市民控訴，醫護罷工期間，其舅父喺威爾斯親王醫院病房內失救死亡。囍雨真係唔知，果班罷工醫護睇到呢個消息，會唔會有「些少」內疚、自責？但當佢哋不斷要求唔好「秋後算帳」時，囍雨都想講，冇錯！有啲「帳」，依家就應該「算一算」！
一宗原本或可避免的悲劇
根據家屬憶述，其93歲嘅舅父上星期五入院，只係做個小手術，之後轉入病房稍作休息，原本翌日就可出院；孰料兩小時後，家人突接獲醫院通知，稱舅父因跌落病床導致顱內出血，最終搶救失敗。而當值嘅醫護就解釋，當日因為醫院一半醫護人員參與罷工，導致人手不足，又適逢交更，因而導致今次事故。囍雨睇番成件事，覺得最心痛嘅係，死者唔係捱唔過疫症、捱唔過手術，但就偏偏「捱唔過」有醫護搞罷工。其實，原本一切都根本可以避免——如果，有足夠嘅人手堅守崗位；如果，冇人攞病人權益當籌碼…
當局應處分罷工搞手！
只可惜，呢個世界冇「原本」、冇「如果」。嚟到呢一刻，囍雨只想請果班罷工搞手、參與罷工嘅醫護睇清楚，當你哋口口聲聲標榜自己「為香港好、為病人好」時，事實就係，當香港、病人最需要你哋嘅時候，你哋選擇咗為自保當逃兵；唔單止直接令「戰友」們百上加斤、承擔更多辛勞、責任，依家仲要間接害死埋病人！大家又有冇見過果班幕後搞手出嚟回應過半句？囍雨在此要呼籲，請醫管局以至政府，都要嚴肅考慮處分罷工搞手，否則，怕只怕香港嘅罷工行動會「沒完沒了」。
事實上囍雨見到，另一個醫護組織「香港護士協會」已經打算緊「接力」罷工或按章工作、職工盟屬會「建築地盤職工總會」又話「不排除任何工業行動」。囍雨想講，無論任何人士、有咩不滿、訴求都好，可否唔好攞公眾利益作為籌碼呢？個道理其實好簡單，就好似醫療系統，做任何嘢其實都應該係以考慮病人為先；又例如教育界，大家又有冇見過，任何措施係以「保障老師」優先而唔係保護學生呢？囍雨喺度仲想提多大家一點，就係留意下每逢有罷工，「台前幕後」都仲會見到一啲「好常見」嘅身影，呢啲人究竟係「為民發聲」？定係趁火打劫以謀取自己嘅政治利益？大家真係要「帶眼識人」啦！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論