喺噚日一個電台節目，有份協助今次醫護罷工嘅香港物理治療師總工會籌委會籌委陳家輝接受訪問，大談「封關之道」，不過佢似乎對於「全面封關」嘅具體執行，自己都有啲一籌莫展，當主持人問佢「全面封關」香港人出入境會點，佢就答香港人都要做一啲隔離，主持再問佢每日幾萬香港人返香港點隔離，佢就話政府要安排合適地點；之後主持人再問佢每日幾萬人基本上無可能搵到地方做隔離，質疑佢哋連細節都未商討好，就將工業行動再升級，點可以要求政府做「不可能的事」，陳家輝就立即語塞無聲出。其實，「封關」已經成為口號，但問題在於，如果香港人由內地回港都要隔離，實際上可行咩？
讓數字說話！
「醫管局員工陣線」近日不斷話要罷工，而噚日亦將罷工計劃付諸行動，令本港公立醫院嘅服務大受影響；囍雨喺度必須指出，佢哋所講嘅「封關」，係香港人可以自由出入，但返港後要隔離14日，囍雨要問下，每日幾萬人由內地或者其他地方返香港，點隔離到咁多人呢？以2月2日為例，當日有超過12萬香港居民喺唔同管制站入境，如果要隔離十萬人，或者退一步當只有一半喺內地番嚟，都有五萬人，點隔離呢？香港缺地就係人都知，要特區政府一下子變個地方出嚟隔離咁多人，啲煽動醫護罷工嘅人，有冇方法解決？定係佢哋根本只係要求政府做近乎唔可能做到嘅事，大家真係要睇清楚！
連運送食品的司機都要隔離？
「封阻」香港人，絕對唔止將喺內地嘅港人隔開咁簡單，其實每日平均約有9,000架貨車或者貨櫃車由內地到香港，車上面裝嘅係大量香港人嘅生活必需品，有香港人需要食嘅肉食、蔬菜同其他副產品，甚至有棺材。囍雨又想問一句，內地返香港嘅貨車同貨櫃車司機，係咪都要隔離？如果唔係，唔驚佢哋將疫症由內地帶到香港咩？如果係，佢哋生計點算？佢哋被隔離，咁送嚟香港嘅食品、副食品又點算？係咪要佢哋運一轉貨就隔離14日，一個月開兩日工？一班罷工醫護大叫「全面封關」，係咪要封埋香港人獲得食品、副食品嘅途徑先？
對於所謂「全面封關」，唔可行嘅問題實在太多，囍雨都未講住喺內地例如深圳但要嚟香港返工嘅人，亦未講有未成年親人在港、需要經常來港照顧親人嘅人；真心想問一班「政治背景」頗為濃厚嘅罷工發起人，其實你哋係咪想香港「攬炒」，所以借機喺度煽風點火，以病人作為籌碼、人質，大耍政治先？收手啦！
原圖：文匯報
請Follow我們的YouTube頻道：
下載我們的手機應用程式，收看第一手精彩內容：
評論