依家新型肺炎疫情嚴重，本港防疫形勢嚴峻，按理講，依家正正係需要政府、市民、醫護齊心協力對抗疫情嘅關鍵時候，但偏偏就有醫護公會將防疫「政治化」，撈取政治資本，更揚言發動醫護罷工，要挾政府全面「封關」。廣男想講，係呢個時候搞醫護罷工，根本就係想成個香港醫療體系陷於停頓；萬一香港真係出現「有病冇得睇、冇得醫」，大家諗下，呢班人真係為香港好，為防疫好咩？
趁住修例風波建立嘅新醫護工會組織「醫管局員工陣線」，近排不斷煽動醫護與政府間嘅對立，並「借勢」招攬新會員。按照呢個工會組織嘅「計劃」，聽日（1/2）會召開會員大會商討罷工行動，後日再同醫管局談判，一旦談判失敗，將會於下星期發起一連5日嘅罷工行動，務求令醫管局只能提供有限度緊急服務，而且唔排除「繼續升級」，直至自己「訴求」得到滿足為止。廣男想問，呢個所謂工會，究竟係醫護組織？定係政客組織？如果係醫護，呢班人仲記唔記得自己天職係咩呢？
是否代表醫護界？
講到「醫管局員工陣線」，廣男覺得有必要先帶大家簡單認識下。「受惠」於「7個同類行業人士便可籌組工會」呢條條例，「醫管局員工陣線」趁住持續多月嘅黑暴運動「應運而生」，其立場當然又係同盲反派「同聲同氣」。但呢個組織架構如何？究竟現時有幾多會員？老實講，廣男真係了解唔多，不過翻查新聞報道，呢個工會今年1月5號先至首次召開「會員大會」選理事，當時得百幾人出席、70幾人投票；15個理事空缺，最終只選出8位。睇完呢啲數字，廣男又想問下，大家認為呢個「醫護組織」，又係咪有資格代表成個香港醫護界呢？
不履行職責 又要「發展壯大」
廣男就質疑，呢班人根本就係一心搞政治，冇心幫市民，最令人憤慨嘅，係佢哋唔單止自己有違專業，仲要煽動其他人違背自己嘅職責、使命。廣男想講，依家疫症當前，如果你哋真係驚、要做逃兵，不如自己辭職喇！就算對政府不滿，有一己「訴求」，千萬唔好攞市民、病人嚟做籌碼！廣男係度又想請大家不妨睇下，呢班人依家自己唔辭職，但又要以罷工威脅市民、要挾政府，仲要不斷招攬會員「發展壯大」，佢哋究竟係為自己利益？定係為病人權益？大家心中有數喇！
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論