囍雨今日睇生果報旗下嘅「果籽」，睇到一則歪理奇聞，真係忍唔住要同大家「分享」一下。篇文話，政務司司長張建宗之前曾經提過，多月黑暴運動，令全港大約有長度相等於42公里嘅欄杆被暴徒拆走，但呢番話就「令不少人注意到，香港欄杆多到一個不可思議的地步」；被大量拆毀後，非但冇影響日常生活，「反而感覺街道比以前好走，在城市漫步時也來得比較自由」。囍雨想講，依家香港，齊心防疫係頭等大事，呢啲媒體喺呢個時候仲要寫啲咁嘅「故仔」，究竟想點呢？係要繼續合理、合法化黑暴嘅破壞，定係要煽動啲「衝衝子」繼續破壞？

為咗「豐富」歪理，「果籽」仲請嚟「以觀察城市為樂」嘅「研究者」，進一步指責香港係一個「欄杆城市」，再「推演」落去，就係「海量欄杆背後所反映的，可能是一種專制的管治思維」；而透過「欄杆被破壞」，就「揭示城市本有的流弊」、「彰顯由公民和社區本有的能動性」。對於文中所講嘅「不少人」究竟有幾多人，大家都唔知，亦都無法求證；至於文章提出「欄杆本身的存在意義為何」呢種小學級常識問題，囍雨亦都留畀大家自己去「思考」，囍雨只想講，果籽以至生果報為咗縱暴、煽暴，連咁嘅歪理都講到出，實在令人「嘆為觀止」！

戴口罩都唔方便 唔戴得唔得？

套用「果籽」所宣揚嘅「理論」，囍雨想問，咁不如將全港所有馬路圍欄都拆晒佢，咁係咪更加好行啲？不如再拆走所有交通燈，畀行人、車輛有「更多自由」？甚至按照呢個邏輯推到極致啲，連斑馬線、行車線、以至行人天橋、通道都統統取消，係咪更方便大家「城市漫步」呢？講真，依家為咗防疫，大家日日都要戴口罩出行，囍雨都覺得好唔舒服、唔自由，好影響日常生活，生果報又使唔使用番呢套歪理邏輯，叫大家齊齊除低口罩呢？

疫症當前 繼續煽暴？

依家咁多圍欄被暴徒拆毀，當某啲人「反而覺得好咗」、「更加自由」嘅時候，囍雨又要問下，咁其他市民呢？仲有咁多老人家、小朋友、以至傷殘人士，佢哋又有冇自由出行嘅安全？大家當然明白，生果報又係想「借啲意」扯去講「專制管治」問題，但請搞清楚，圍欄又好、交通燈又好，背後所體現嘅唔係咩「專制」，而係文明社會應有嘅規範、法治！暴徒表面上係拆毀圍欄，實質上係打爛緊香港法治；暴徒得到「自由」嘅代價，就係剝奪全港其他市民嘅安全、自由。依家香港全城都喺度專心抗疫，生果報同「果籽」仲有「心思」作埋呢啲「故仔」去煽暴，仲有冇良知呢？

圖片來源：中通社

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app