對於由盲反派把持嘅區議會，囍雨之前寫過唔少佢哋越權、玩弄政治嘅事例，本來已經冇咩興趣再多講，不過噚日聽聞黃大仙區議會一班盲反派議員，調番轉頭譴責民政總署「越權」，囍雨又相當好奇。原來黃大仙區議會原定噚日召開「商討應對新型肺炎」嘅特別會議，但民政總署官員因應疫情，最後建議取消會議，但就招致一批盲反派批評「越權」、「肆意妄為」，仲有人話「政府依家唔做嘢，又阻住我哋做嘢」。囍雨睇新聞，呢班盲反派邊鬧邊帶埋政治標語，真係想問下，冇得開會，究竟係阻住你哋「做嘢」？定係阻住你哋又搞政治宣洩呢？
囍雨想講，大家要明白，喺依家咁嘅疫情狀態下，確實應減少聚集人群，以此建議取消會議，其實情有可原；而且政府早前已經安排公務員「留家工作」，民署官員響應呼籲亦都無可厚非。雖然依家防疫、抗疫係頭等大事，但囍雨見到噚日黃大仙區議會嘅議程，原來仲包括「強烈譴責特首林鄭月娥政府不理市民死活」、「要求駐港部隊開放軍營作隔離營、封關」等動議，囍雨想問，唔通呢啲，又係屬於區議會「職權範圍」咩？依家究竟邊個越權先？
區議會討論「徵用軍營」？
喺依家咁嘅環境之下，大家對於防疫工作有咩建議、意見，可以提出、可以理性討論，囍雨覺得冇問題，但講到「開放軍營」、「封關」等，囍雨想問，呢啲事情，係咪交由香港其中一個區嘅議會，就可以處理得到呢？退一步講，就算開得成會，又係咪民政總署嘅官員就有權去做決定呢？當呢班盲反派係咁指摘官員「越權取消會議」時，囍雨想講，依家似乎係啲你哋做緊一啲超越「職權範圍」嘅嘢，然後又強人所難去處理一啲唔屬於自己職權範圍嘅事喎，咪即係要求官員去越權？會唔會太離譜呢！
區議員做好本分了嗎？
如果呢班政客真心想為市民「做嘢」，囍雨就話，除咗討論「軍營、封關」之類，作為理應服務基層嘅區議會，其實仲有好多「實際嘢」可以做，例如向市民宣傳正確嘅防疫措施、搞好社區衛生環境等等，唔好成日得個鬧字、自己又唔去做好本分喇。尤其係當有人大大聲講到「政府唔做嘢，又阻住我哋做嘢」時，大家又不妨睇下，原本聽日開嘅立法會財委會未取消之前，啲盲反派都係咁要求取消開會；之前有得開會時，又係班盲反派日日拉布，唔通果啲「塞車排隊」嘅民生項目唔緊急？又係邊個唔做嘢、又要阻住政府做嘢？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論