新型肺炎肆虐，香港確診個案增至十宗，正當全城都嚴陣以待嘅時侯，少部分醫護人員竟然想做「逃兵」！過去四日之內，瑪麗醫院、東區醫院及博愛醫院，先後共近百名護士集體請病假，之後醫護組織「醫管局員工陣線」仲醞釀喺下星期一起發動一連五日嘅罷工，又聲稱已經有4,638名醫護人員承諾參與。見到呢個情況，廣果真係好想問佢哋一句，疫症當前，點解可以咁無承擔？係咪要置病人嘅生死安危不顧？你哋仲記得自己從醫嘅初心嗎？
若真不想做 不如辭職
面對部分醫護人員嘅罷工威脅，香港政府華員會都要緊急發出呼籲，希望全體醫護人員秉持非政治化專業操守，摒棄「罷工」等嘅脅迫手段，避免影響公立醫院嘅運作，為社會增添不必要的公眾恐慌；港大感染及傳染中心總監何柏良亦直言，自己唔會參與罷工，更加唔會煽動其他人參與，佢希望所有醫護人員都可以係呢個艱難時期緊守崗位，佢又話，如果醫護人員覺得道德上嘅矛盾太大，「過唔到自己」，就不如諗諗係咪要辭職！
有經驗有能力 卻沒有了承擔？
廣男覺得，想罷工嘅醫護人員都應該聽聽呢啲理性嘅聲音，如果佢哋對局方、政府嘅防疫措施不滿、有意見，可以大家平心靜氣，坐低慢慢傾，而唔係大難當前就拂袖而去。大家回想下，黑暴運動持續七個月，警察面對黑暴威脅，仲要承受住抹黑、辱罵甚至攻擊，依然謹守維護抵禦違法暴力嘅第一條同最後一條防線，佢哋又有無因為怕被起底、掟汽油彈、炸彈威脅、需要長期OT、隨時有生命安全威脅，就丟低市民同社會治安唔理，走去搞罷工？同理，消防都係一樣，始終堅守崗位、履行職責，佢哋又有冇因為危險、「怕」，而唔去撲火救人？
醫護人員之所以一直受到社會尊重，被譽為白衣天使，係因為佢哋嘅天職、使命，就係救死扶傷、濟世為懷，因為市民信任，願將生命安危放心託付。嚟到依家，疫症當前，人命關天，醫護人員有經驗、有能力，為我哋對抗病毒，但部分人點解就偏偏無咗專業精神、無咗一份承擔呢？如果連你哋都害怕、退縮，咁呢場「抗疫戰」，仲可以點打落去？看看市民，你哋拂袖而去，於心何忍？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論