一場黑暴運動，令囍雨睇清楚好多嘢，包括政客為達政治目的不斷煽動他人嘅醜惡咀臉，外國勢力為反華不斷借香港「興波作浪」嘅「陽謀」，原來，好多人係想睇住香港「點衰」；今日囍雨睇新聞，見到《經濟學人》智庫發表2019年全球民主指數排名，香港排名同評分都「有所下跌」，同2018年比較，香港喺「政府運作」、「選舉過程和多元性」評分亦同告下跌，該智庫稱政府對社會動亂「不作妥協」，警方就展現「好鬥」、「挑釁」態度。囍雨真心想問，如果政府運作受到影響，係由咩原因造成嘅呢？係政府自己，定係黑暴搞成咁？
請先認清真相
如果話「政府運作」受到影響，相信無乜人會反對；但囍雨想指出一點，「政府運作」受到妨礙，唔係政府本身令到自己運作出問題，好簡單兩個方面，喺議會內有盲反派議員「拉布」、拖政府後腿，議會外就有一大班暴徒日日破壞社會，喺咁嘅情況下，「政府運作」點會唔受影響？點解《經濟學人》會將重點放在政府身上，而唔指出暴徒打砸搶燒，甚至殺人放火呢？
同理，當《經濟學人》意欲批評香港警方嘅時候，所謂警察「好鬥」，真係令人啼笑皆非，面對暴徒不斷升級嘅武力，警方可以「溫和地」回應咩？至於話「選舉過程和多元性」評分都下跌，其實道理仲簡單，如果有人連效忠特區、擁護《基本法》都唔願意，唔符合參選資格，點解政府要俾佢哋參選、走入建制而又破壞建制，甚至搞「奪權」呢？囍雨記得港英年代留落嚟嘅法例，都包括諸如唔俾人搞「叛亂」嘅法例。
民主包括打砸搶燒？
如果講一個地方係咪民主，唔少人首先睇下呢個地方嘅政制，睇下佢係咪主要官員、議員都係民選啦；但作為智庫，係咪都應該有智慧睇清楚，依家香港一班暴徒經常打砸搶燒，妨礙他人自由甚至傷害他人，先至係對民主以至自由嘅最大傷害呢？同埋講真，如果要講民主，外國智庫不如回顧下，幾年前特區政府推出符合《基本法》、人大常委會決定嘅普選方案，係邊個將方案推倒，令香港政制停滯不前？如果一個智庫睇嘅嘢同香港盲反派隨口指控、抹黑嘅嘢係一致甚至係「一樣」嘅，好抱歉，囍雨唔同意，甚至只能講一句，好失望！
請Follow我們的YouTube頻道：
下載我們的手機應用程式，收看第一手精彩內容：
評論