之前廣男寫文都講過，坊間好多人熱烈討論「黃色經濟圈」，但廣男對「黃色經濟圈」嘅前景就有所保留，因為如果香港經濟俾黑暴徹底攬炒，啲黃絲生計都成問題，「黃色經濟圈」係咪可以持續，都係一大問題；今日再睇新聞，就見到有傳媒報道將會陸續「關門大吉」。陸續有「黃店」倒閉，撇除經營不善等因素，可能黑暴攬炒嘅，絕對會包括埋「黃店」，經濟唔好，「黃店」想獨善其身，難矣！
有人飽死 有人餓死？
喺呢度，廣男首先戴返個「頭盔」，就係廣男預計，喺反政府人士大力吹捧「黃色經濟圈」嘅情況下，相信部分或者少部分「黃店」生意可以持續，甚至唔愁無生意；只不過，經濟唔好係大勢所趨，就算個別「黃店」有得做甚至「飽死」，相當部分「黃店」都好可能因為經濟唔好而受到打擊，輕則裁員減成本，重則「關門大吉」。
當中道理其實好顯淺，就算一大班「黃絲」願意支持「黃店」都好，但經濟唔好唔少「黃絲」都要減少消費，咁又點會好似經濟好果時，咁多錢去支持「黃店」呢？另一個問題係，「黃店」表態，自然會令到藍絲少幫襯，甚至自絕於內地旅客（仲要內地旅客大幅減少），單單依靠「黃絲」，仲要係佢哋本身可能要減少消費嘅「黃絲」，依家有新聞話「黃店」陸續結業，真係一啲都唔出奇！
「外黃內紅」的店？
有唔少人都質疑過「黃色經濟圈」，話佢哋無論係用食水、食材抑或材料，好多都來自內地，咁「黃色經濟圈」根本就唔係黃色，廣男形容呢個經濟圈可以用「外黃內紅」嚟形容，如果真係要建立「獨立、自主」嘅經濟圈，可能真係要唔用東江水，而用「外國礦泉水」 … 政治立場，依家喺香港幾乎「人人都有」，但廣男只係普通市民，真係唔想連食飯都要「分黃藍」，黃絲入咗藍店唔開心，藍絲入咗黃店又尷尬；其實，平時工作、讀書以至「睇政治」都咁辛苦，真係食餐飯都要「政治先行」？咁樣好唔暢快啫！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論