最近廣男睇緊一本講解Public Law（公法）嘅書，入面花咗好多篇幅，講一個政府如果「越權」（Ultra Vires），市民就可以透過司法覆核去尋求法庭介入；今日睇新聞，廣男見到灣仔區議會噚日提出「促請政府回應五大訴求，重組警隊和監警會」動議，三名警務處代表喺討論有關議案時離開，該區區議會主席對「警方代表缺席會議、拒絕回應議員質詢表示遺憾」。其實，依家啲區議會擺明想處理政治、政制甚至政府管理問題，擺明「越權」，應該係市民對區議會「不務正業」表示遺憾就真！
區議會只是諮詢架構
當依家由一班政治素人、本土派同傳統盲反派把持嘅區議會次次開會「有新意」嘅時候，無論係「解散警隊」抑或研究「區內入境政策」、「政制」，大家首先要問一句，區議會作為一個「諮詢組織」，有權處理呢啲嘢咩？成班人選到區議員就當個地區甚至香港都係佢哋「管」嘅咁，但事實係佢哋只係負責「俾意見」同處理下啲撥款，好心就唔好「越權」啦！
至於佢哋要求「重組」警隊，撇除呢個唔係佢哋處理嘅範圍，廣男覺得呢個要求相當「古怪」；退一萬步講，當佢地對警隊有不滿，但如果要先解散警隊再重組，喺重組警隊前，香港邊個維持治安？係咪由班區議員去維持秩序？廣男好多時睇新聞，剩係見到佢哋縱容打砸搶燒，甚至睇住市民被暴徒圍毆「私了」都只係喺度袖手旁觀，如果無警隊執法而得番班用暴力解決問題嘅暴徒同趁火打劫嘅不法之徒，咁香港就真係玩完喇！
議會是「開騷」場地
有啲人會覺得奇怪，點解一班區議員明知自己無權做某啲事，或者某啲事擺明係唔合理，都仲要喺區議會搞咁多嘢？當中原因，就係一班「新科議員」喺選舉時開出種種「支票」，答應選民會爭取呢樣、果樣，包括「五大訴求」、追究「警暴」等等；依家當選喇，佢哋自然要做嘢，不過，係做一啲佢哋根本「無權做」嘅嘢。近期一連串嘅區議會鬧劇，反映出一樣嘢，就係政客將區議會變成「開政治騷」嘅表演場地，受害嘅就係用公帑資助區議會、期望區議會解決社區問題嘅各區居民！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論