舊年區選，盲反派靠「五大訴求」、靠「與黑暴同行」，喺17個區議會「成功」奪權，唔少「反派」人物仲做埋區議會主席，大家都明白，跟住落嚟，佢哋嘅主打工作必然係反政府、反內地、以至宣揚「本土主義」。最近海洋公園申請撥款搞新發展計劃，想藉此提升吸引力、吸金力，之但係，做咗南區區議會主席嘅民主黨副主席羅健熙，一如所料發揮佢嘅反對角色，仲將矛頭直指內地遊客，喺佢facebook白底黑字話「大陸自由行旅客是鴉片」、「造成大量社區問題」云云。囍雨就覺得，既然係咁，不如請羅主席再講得清楚直白啲：「南區不歡迎大陸遊客」。「戒咗鴉片」，咪一了百了囉！唔知羅主席又敢唔敢呢？
外國城市唔會斥「鴉片」
講真，海洋公園打算搞新發展，對香港人嚟講的確唔係「小事」，大家有討論、有唔同意見好正常，但囍雨最睇唔過眼嘅，係啲盲反派政客成日都將啲問題有理無理都賴落去內地遊客身上，然後侮辱一餐！大家要明白，香港大力發展旅遊，唔係為咗「討好」某一類遊客，重點係好多基層市民、打工仔，係靠旅遊業同埋相關行業揾食；旅遊業走下坡，連帶衝擊嘅結果，就係失業率上升。大家又有冇見過其他好似香港咁嘅國際旅遊城市，例如倫敦、紐約、巴黎、東京等，會話某某地方嘅遊客係「鴉片」呢？
羅健熙話，「遊客不止內地一途」，啱！之不過冇咗內地客，呢個缺口又靠邊個嚟填補呢？囍雨又想請教下羅健熙，佢有咩辦法可以爭取到同內地遊客同等數量嘅歐美、日韓、東南亞遊客呢？不如提出建議更實際喇！
請羅主席解決問題
既然羅健熙話自己講「鴉片論」講咗好多年，咁依家佢做埋代議士，又「好關心」社區民生，咁大家真係要請羅主席下決心帶領南區「戒鴉片」，之不過咁，囍雨覺得大家要先問清楚羅主席，如果因為內地客唔嚟，整體遊客少咗，區內啲商戶生意額減少、經營困難；靠旅遊業搵食嘅打工仔生計出問題、甚至失業，佢又有冇辦法幫到大家「解決問題」先？如果冇，大家又要諗下，如果啲政客一味淨係反對、批評，講完自己啲政治主張又完全冇建議、冇follow up（跟進），甚至冇實質嘢做出嚟幫到市民，咁呢啲人又係咪對得住自己身份，對得住選民一票呢？
囍雨聽聞南區區議會聽日就開會，到時請羅健熙主席唔好逃避問題，明確表態「南區唔要內地客」！但同時，請務必攞出長遠有效嘅「良策」，唔好齋得個「吹」字！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論