之前某套電視劇一句「誰大誰惡誰正確」嘅對白，成為香港市民嘅口頭禪，囍雨覺得呢句說話特別適用於「今日香港」，因為綜觀呢七個幾月嘅黑暴運動，班暴徒就係以為「自己最惡」，四處打砸搶燒，然後仲覺得「自己啱晒，政府錯晒」；囍雨估唔到嘅係，呢種社會歪風竟然仲蔓延到維園年宵，社民連違規喺維園展示政治標語同所謂「展板」，仲要大聲夾惡叫食環署「夠薑叫警察入來清場」，囍雨想問，依家到底係邊個唔啱先？如果大聲就得嘅，以後冇人要守規矩啦！
社民連志在做政治騷
如果大家有睇新聞或者有打算去行年宵都會知道，由於黑暴影響，今年年宵市場只設立「濕貨區」，社民連作為中標者、營運者，應該好清楚知道佢哋喺維園擺年宵，只可以做一樣嘢，就係賣濕貨例如鮮花，佢哋依家喺度放展板開「展覽」，極可能違反《二零二零年宵市場特許協議》，食環署無可能視而不見。囍雨真係懷疑，佢哋到底係「乾濕不分」，定係覺得自己可以以「賣濕貨」為名，喺維園為所欲為？
對於食環署嘅警告，社民連主席吳文遠仲話食環署荒謬，稱「不同人有不同做生意方法，確實有不少人因反警暴到社民連的攤檔買花」，如果套用吳文遠嘅邏輯，咁佢哋咪除咗可以喺維園擺展板，甚至喺維園「賣濕貨送乾貨」都得？咁樣好明顯唔係政府因黑暴而決定取消「乾貨區」嘅原意，肯定亦唔喺年宵市場嘅「特許協議」之內。一句講晒，社民連就係掛羊頭賣狗肉，喺度做政治騷！
必須嚴肅處理社民連攤檔
如今有政治組織喺維園搞政治騷，囍雨覺得政府、食環署必須嚴肅處理有關問題，否則以後唔會再有人遵守政府同中標者之間嘅「特許協議」。封鎖社民連嘅所謂「濕貨攤位」，絕對係在所難免；但囍雨覺得，咁樣係唔足夠嘅，為咗有足夠嘅阻嚇力，諸如社民連呢啲「紀錄不良」嘅團體或者商號，應該要將佢哋列入黑名單，考慮唔俾佢哋再競投年宵攤檔。黑暴運動嘅出現，令到好多人包括政客覺得自己唔需要守法，囍雨建議政府由年宵開始嚴格執法，杜絕政客喺政府場地散播謠言、抹黑政府！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論