之前喺一次盲反派搞嘅遊行上面，有參與遊行嘅市民講到明，單係靠「和理非」遊行係唔足夠嘅，因為亦需要勇武出嚟，即係「和勇一家」先得。到啱啱星期日由盲反派搞嘅集會（及後變成非法集結），有人更將呢種「需要勇武派」嘅論述提升一個層次，聲稱「根本十項（民生）措施它（政府）為了贖罪，如果不是年輕人出來，我想都不會推出來，是真的，根本這些訴求說了很久」，將政府推出惠民措施，變成係年輕人甚至勇武派「成功爭取」，廣男唔明，係咪即係一切「好嘅嘢」，都要歸因於年輕人同暴徒？呢種「暴力可以解決問題」嘅說法，係咪有道理？
暴力爭取惠民措施？
對於政府點解喺呢個時候推出十項共涉款一百億元嘅惠民措施，廣男唔係政府中人，又無貼近消息人士，當然就唔太清楚啦！之但係，如果有人認為係年輕人、暴徒「行出嚟」，迫使政府要推出惠民措施，廣男請大家先睇下班暴徒做過啲乜，再諗下佢哋係「為香港好」，定係「搞衰香港」。
喺黑暴運動持續呢七個多月，無數商舖俾暴徒裝修，輕則玻璃被打爛，重則成間舖被燒成灰燼；市民行過示威區，隨時被暴徒「私了」，拳打腳踢已經算「小事」，嚴重者俾暴徒用成個渠蓋砸向頭部，甚至被淋易燃液體再點火焚燒。
用傷害他人手法爭取要譴責
其他無論係執法嘅警察、路上嘅磚塊、交通燈等都「無一倖免」，如果有人要「多謝」年輕人、暴徒走出嚟，係咪佢哋做過嘅「喪盡天良」之事，都要一筆勾銷，仲要調返轉多謝佢哋呢？
年輕人要上街遊行、集會，當然無問題，但如果係犯法、傷害到他人，對唔住，香港人唔應該多謝佢哋，而係要「多得」佢哋！「多得」佢哋，將香港搞到烏煙瘴氣，令本來燦爛嘅動感之都，變成世界公認嘅「動亂之都」。用傷害他人嘅方式嚟爭取訴求，大家應該要譴責，更要支持執法部門將佢哋繩之於法，而唔係日日「造故仔」，將暴徒變「英雄」！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論