教協早前喺愛丁堡廣場搞集會，聲稱要對抗「白色恐怖」，但集會未有太大迴響，就俾人踢爆佢哋喺集會人數上「報大數」，明明警方統計只有約2,500人參與，佢哋就堅稱有「兩萬教師參與集會」；日前，就有人喺網上發起聲討《教協造假作大》聯署，直斥教協逆道而行，有違教師專業。囍雨認為，教協喺集會人數上先講大話報大數，繼而「大話冚大話」不斷「作大」，社會各界絕對不能輕輕放過呢個所謂嘅教師組織。
廣場不可能容納萬人
喺呢度，囍雨又要recap一下，教協稱愛丁堡廣場容納咗兩萬人參與集會，但係根據社會人士委托專業測量師做嘅計算，廣場面積大約只係有4,200平方米，如果要容納兩萬人，每平方米要「坐或佇立」至少4.79人，即係每平方米要「容納」近五個人；做得教師嘅，一定係成年人，點樣一平方米容納五個教師？就算啲教師個個都識「縮骨功」，都好難喺廣場聚到咁多人呀？
作為教師組織，喺集會參與人數上弄虛作假，本身已經令人覺得難以接受，試問一群要講求誠信嘅教師、教師代表都公開「講大話」，咁佢哋點樣教學生？點樣以身作則？更嚴重嘅問題係，教協以至喺立法會代表佢哋嘅教育界議員葉建源，竟然仲要再公開「大話冚大話」，稱人數係經過「專人點算」、「經真實可靠的方法得出的數字」，囍雨真係想問下教協以至葉建源，你哋仲想講幾多個大話？點解要呃完市民一次，又再呃一次呢？
一同譴責教協
對於有組織搞聯署譴責教協，囍雨認為十分值得支持，因為繼續縱容教協以至盲反派其他人士造假，咁社會以後只會充斥更多「假公布」、「假新聞」，而教協作為教師組織，竟然「一次又一次講大話」，就更加要譴責！葉建源前幾日仲信誓旦旦稱教協集會有兩萬人，但呢幾日似乎仲未見佢有進一步回應質疑；喺呢度，囍雨要問下葉建源至教協，你哋諗住再公開交代事件，定係就講大話「報大數」事件向公眾道歉？定還是等事件不了了之，然後到下次集會又將人數「自動放大」？黑暴運動持續七個多月，運動反映出教育界千瘡百孔；其實，只要睇下教協呢啲教師組織嘅「表現」，大概就會知道，教育界邊可能無問題，有縱暴、作大甚至涉嫌違法嘅教師，就自然出現唔少「問題學生」！
原圖：大公
請Follow我們的YouTube頻道：
下載我們的手機應用程式，收看第一手精彩內容：
評論