2014年嘅違法佔領事件，令無數香港人生活受到影響，事後9名「佔領主事人」被告上法庭、定罪甚至入獄，當中包括喺港大教書嘅戴耀廷同喺浸大教書嘅邵家臻，後者更加係現任社福界立法會議員，外界都不斷有聲音要求港大、浸大解僱二人，最近浸大決定暫停邵家臻教學職務，佢就會見傳媒，稱浸大「政治打壓及清洗」、將其「除之而後快」等等，仲叫人關注「大學係咪已經跪低」。其實，廣男覺得件事十分簡單，有人違法被定罪，如果無上訴成功，基本上都係「罪犯」，點解大學要縱容、包庇佢哋先？
有違程序公義？
盲反派教師被停職，通常都同邵家臻一樣有相同嘅辯解，就係話法律程序未完成，未審嘅就話「未審先判」，審咗被定罪嘅就話「上訴未有結果」，總知就係唔可以「郁佢哋」；但廣男用另一個角度睇件事，邵家臻已經被定罪仲要監都坐埋，與其話「上訴未有結果」唔可以停佢職，其實件事係咪佢一日上訴未成功或無成功，佢一日都係「有罪之身」先啱呢？點解大學唔可以停佢教學職務？
無論係邵家臻抑或戴耀廷嘅Case，廣男覺得道理都係一樣，除咗已經被定罪嘅事實問題，就算退一萬步講佢哋案件「仲未受審」，大學點解要縱容一啲涉嫌違法嘅教師繼續教學生呢？邵家臻教嘅係社工系，學生相當部分應該係「未來社工」，一個主張甚至實行「違法達義」嘅講師，如果俾佢繼續教書，佢會點樣教啲社工學生？教佢哋違法達義？定係教學生「有政治理由可以為所欲為」？作為教師、大學講師，仲要係教社工嘅，社會對講師有更高標準，根本就好正常。
不是打壓是矯正
至於邵家臻嘅「打壓論」，當然一樣唔能夠成立，如果講政治意見，廣男相信唔少大學講師同教授，多多少少都有「反政府」立場，俗啲講就係「黃絲教師」，點解大學唔去停其他講師、教授職，而要停邵家臻職？原因其實好簡單，因為邵家臻真係被法庭定咗罪，仲要坐埋監嘛！調返轉講，如果因為一句「上訴緊」就唔駛處理邵家臻，他日有其他講師、教授犯法，甚至犯咗嚴重罪行，係咪只要審緊、上訴緊，學校就唔駛處理？按此邏輯，涉嫌犯咗性罪行嘅教師都唔駛「處理住」？其實睇勻成件事，理虧根本就係邵家臻，而理虧者仲要講到自己係「受害者」咁，所以廣男幾時都話，盲反派政客，幾時都係「最惡」嘅！
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論