一批本土派、素人以至黑暴「同路人」喺區議會成功奪權之後，大家幾乎預見得到，佢哋點都會利用「身份、權力」為黑暴「做番啲嘢」，就好似噚日中西區區議會咁，成為一班黃絲政客譴責、追究「警暴」嘅主場。難能可貴嘅係，警隊「一哥」鄧炳強率先親身落區、直面質詢，對於一切針對警隊嘅誣衊、攻訐、抹黑，都堅持據理力爭，用事實說話。廣男覺得，鄧炳強不卑不亢嘅表現，展現咗「一哥」應有嘅風範，更重要嘅，係為其他官員日後落區應對政客無理刁難，樹立咗好榜樣、好示範，絕對值得大家支持、畀個like！

身為代議士 屈得就屈？

綜觀噚日一班區議員嘅發言，廣男想講，佢哋基本上就係將「謊言講千次就會有人當真理」嘅神邏輯發揮到極致，講嚟講去又係「警察砌示威者生豬肉」、警察「強姦被捕者致孕」、被捕者「被送中」以至「被自殺」等等，鄧炳強都一一據理反駁，對於胡亂抹黑同惡意中傷就絕不接受。其中鄧炳強有兩句說話，廣男覺得佢講得好好，就係對於果啲肆意破壞嘅人，「如果唔稱呼為暴徒，實在唔知可以稱呼為乜」、「真正要道歉嘅，應該是暴徒！」

廣男覺得最離譜嘅係，呢班黃絲區議員為誣衊而誣衊、為抹黑而抹黑，真係無憑無據都乜都講得出。例如東華選區嘅伍凱欣要求鄧炳強「展示證據」，證明警察喺8.31太子站冇打死人，廣男真係睇到O晒嘴，冇死人都要「展示證據」？鄧炳強講得好啱，其實好多發言者作出嘅指控，由始至終都講唔出一個有具體時間、地點、人物嘅實例。廣男就喺度諗，呢班所謂代議士，喺區議會咁嘅公開場合講嘢、指控「警暴」，都係一味靠估靠屈靠「懷疑」，咁佢哋平時喺其他場合，例如對住啲區內街坊，又或者喺自己嘅網絡平台，會唔會更加變本加厲呢？

另一個問題，當啲議員不斷譴責、追究「警方責任」時，廣男又要請大家睇下，佢哋有冇隻字譴責過暴徒暴力呢？講真，過去咁多個月嘅衝突，中西區都係黑暴重災區，有暴徒打砸搶燒，呢班本應該「服務基層民生」嘅議員，又有冇為保障市民免於黑暴恐懼出過一句聲？

理直氣壯講道理

廣男想講，今日香港，依然有黑衣暴徒肆無忌憚破壞，亦都有人千方百計縱暴，一個簡單嘅謊言和謠言，一旦開始，就要講到底。所以大家必須明白，面對謠言謊言、誣衊抹黑，最好嘅辦法就係堅持理直氣壯去講真相、講道理。作為官員、「一哥」， 鄧炳強做得到，希望止暴制亂嘅市民，亦都應該要去做。如果大家唔出聲，只會令歪理有「越滾越大」嘅空間。

原圖：香港警察Facebook

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app