香港大學法律系副教授戴耀廷之前因為「違法佔領」案件被判囚16個月，佢暫時獲准保釋等候上訴，有報道指，港大喺去年成立專門審視戴耀廷等個案嘅「探討充分解僱理由委員會」將會喺今個月內開會，確認係咪要啟動程序同審理有關個案；但係港大校友關注組、港大學生會評論會同港大教師及職員會，就即刻出嚟反對、施壓，仲話戴耀廷都未完成上訴，唔應該終止其教席，咁會違反「無罪推定」原則云云。但廣男想問一句，如果咁講法，其他犯嚴重罪行而等候上訴嘅人，係咪都可以喺學校任教？可以「若無其事」地繼續做教師？

涉違法中學教師亦須停職

廣男就覺得，其實處理戴耀廷教席或者停職問題，同之前處理中學教師嘅問題一樣，主要爭議點都係應唔應該畀「有問題」、涉嫌違法嘅教師繼續教書、接觸學生，但係大家唔好忘記一點，如果畀呢啲「有問題」嘅教師喺課堂到散播「違法達義」思想，後果會有幾嚴重？會再有幾多學生被推上違法嘅不歸路？所以就算係中學教師涉違法，教育局都會要求校方將涉事教師先停職候查，咁戴耀廷點解可以「置身事外」？而且大家唔好忘記，戴耀廷仲要係教法律嘅，試問呢啲違法被定罪、又不斷宣傳「違法達義」歪理嘅「法律學者」，仲有資格教學生法律咩？

「違法達義」始作俑者

最重要嘅一點係，戴耀廷同一般「有問題」教師唔同，佢係「違法達義」始作俑者、「違法佔領」發起人之一，唔單止鼓吹他人違法，仲親身參與其中，帶頭「目無法紀」，如今黑暴行動無日無之，都係因為呢種「違法達義」嘅歪風「遍地開花」；戴耀廷作為「萬惡之首」、打開「潘朵拉盒子」嘅人，就更加要嚴懲、嚴肅跟進，港大必須盡快處理好事件，俾社會大眾一個清楚交代。

事實上，社會對教師嘅期望相當高，除咗有無違法之外，就連教師哋嘅一言一行都會受到關注，因為教師就係學生嘅學習同模仿對象，道德操守亦必須要比常人高，喺校內、校外都必須謹言慎行，就好似教師唔能夠隨處吸煙、講口一樣，以免為學生立下「壞榜樣」。所以，市民大眾又點會接受到，畀戴耀廷呢啲煽動「違法達義」甚至已被定罪判刑嘅人，一邊享用公帑、一邊荼毒學生呢？ 

圖片來源：文匯報

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app