今日香港，有人話已經唔係「講道理」嘅地方，樣樣嘢都政治掛帥，只要被認為係「政治不正確」，就算做好事一樣會俾人鬧；就好似特區政府咁，噚日宣布涉及動用100億元嘅惠及民生措施，有人讚、有人彈，而盲反派政客同媒體就貫徹佢哋「逢政府必反」嘅作風，有啲話無惠及中產同年輕人，有啲就話政府咁樣平息唔到「民怨」。囍雨真心唔明白，乜依家政府推出民生措施、「派糖」都要俾人鬧？咁即係做好事都唔得啫！
必須強調，政府今次推出嘅措施，好多都係社會、基層爭取咗好耐嘅訴求，例如劃一長者生活津貼金額、兩蚊撘車優惠合資格年齡降到60歲以至逐步增加法定假期到17日等等，呢啲訴求大家都想政府落實咗好耐，依家政府積極回應訴求，囍雨實在諗唔到批評嘅理由。至於話措施無惠及中產以至年輕人，其實增加假期、失業人士有時限現金津貼以至劏房租務管制等，呢啲都係惠及埋年輕人嘅舉措；今次紓困措施「好似」只惠及長者、中年咁，係因為佢哋從來都係最需要政府幫助嘅一群，咁亦符合本港提供社會福利「安全網」嘅原則。
盲反派繼續攻訐
其實政府今次推出百億紓困措施，囍雨未睇今日新聞都估到個別媒體、政客以至學者會「繼續鬧」，但囍雨想講，媒體好，政客也好，千祈唔好「為鬧而鬧」！政治上，政客們可以繼續爭取佢哋嘅訴求，但民生上，無論係建制派抑或盲反派，都應該理念一致，致力改善基層人士嘅社會福利，急市民所急，想市民所想。如果呢啲措施之後上立法會果時受到盲反派阻撓，咁大家就可以進一步睇清楚，盲反派根本就係與民為敵，一味引導市民「關心政治」，眼中只有自己嘅「訴求」。
話說回來，喺今次嘅紓困措施當中，有關於為輪候公屋超過三年嘅住戶提供現金津貼、研究推行劏房租務管制以至增加過渡屋嘅房屋措施；囍雨就覺得，今日眾多嘅民生議題當中，房屋可以話係諸多問題嘅「源頭」，政府要真正解決社會問題，增加房屋供應包括公屋、居屋以至私樓嘅供應至為重要。房屋問題唔解決，劏房問題依然嚴重，上唔到樓、上唔到車嘅市民依然都係生活艱苦；既然政府依家有決心面對唔同嘅民生議題，咁就應該攞出更大勇氣，再用力啲解決房屋供應問題，否則民生問題加上政治爭拗，香港想「好起來」都相當困難。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論