「佔中」持續咗成個月，佔中三子、學聯、學民思潮仲未有撤離既跡象。不過，今日聽到戴耀廷、陳健民會返學教書，強調係為咗更持久參與，話要考慮「現實處境」，除咗教學安排，大部分時間都會喺廣場咁話。教授要教書，廣男當然無意見，但係「佔中」兩位教授要顧現實教書，被「佔中」影響既商戶、市民又點先？

從電視新聞報導，見到有位年輕受訪者批評戴耀廷、陳健民，話佢哋信誓旦旦聲稱自己會留守到畀人拉果一刻，但而家就走咗去。唉，算啦，戴耀廷幾個反口覆舌，龍門搬完再搬都唔係第一次啦，當初夠話參加佔領畀警察拘留的話會束手就擒啦，而家？班示威者包圍警察搶犯又有、雞飛狗走又有，邊有企定定畀人捉呀？至於嗰啲「叫未成年人士唔好佔中」呀、「運動失控會叫停」呀咁，當然都係影都冇啦，如果到呢一刻仲信佢哋，就真係太天真喇！

講番「復教」單嘢，廣男唔知戴耀廷、陳健民係咪因為怕再唔番學會飯碗不保，所以終於都返學「復教」。戴耀廷講得好啱，人要考慮「現實處境」，廣男想問，全香港係咪得戴耀廷同陳健民要考慮「現實處境」先？你哋拍下屁股就可以返學繼續高薪厚職，咁其他畀佔領行動影響到既小商戶、打工仔呢？佢哋又有冇得揀先？

佢哋有冇選擇正常做生意、返工既權利？冇！佢哋既「現實處境」，就係生計繼續受佔領行動影響，萬一結業、失業，最多都係得一句，「為咗香港既未來同民主，影響到你哋真係唔好意思喇！」

「將心比己」，係大家成日講既一句話，戴耀廷佢哋自己都知道人要顧現實、要搵食，自己都番學校教書維持生計，點解佢哋又唔諗下其他人，其他人都要顧現實、要工作呢？廣男最近睇緊一本有關猶太人民族個性既書，入面有講到「勿以不利強迫人」，自己都唔願意做既事（犧牲生計），就唔應該強迫、要求其他人去做；用中國人一句說話，就係「己所不欲，勿施於人」，戴、陳兩位教授讀咁多書，真心希望佢哋明白事理，宣布撤離。

作為教育工作者，戴、陳二人都會明白讀書既重要，既然自己都返學教書，都應該規勸下佔領區啲學生返學、返屋企。當初誓要保護孩子既人，說到做到可以嗎？

原圖：jmc.hksyu.edu