普通人犯法，要將佢哋繩之於法；公職人員犯法一樣要被繩之於法，如果相關人士係「明知故犯」，其罪責更加係「罪加一等」！好似「前廉署調查員」、民主黨立法會議員林卓廷咁，早前喺一個記者會上，公開宣稱某個警務人員正被廉署調查，涉嫌違反《防止賄賂條例》第30條、有關披露廉署受查人身份嘅法例；日前，就有一班熱心市民到廉署報案，舉報涉嫌違法嘅林卓廷。廣男就覺得，現時社會法治受損，多多少少都係因為有政客帶頭破壞法治，調查、追究林卓廷，絕對係彰顯法治嘅重要一步！
林卓廷罪嫌極重
講林卓廷涉嫌犯法，點都要同大家講返少少事件嘅來龍去脈，話說早前喺一個盲反派開嘅記者會上面，向來「口不擇言」嘅林卓廷，就突然間「爆料」，稱廉署正調查某警員，根據《防止賄賂條例》第三十條，如果有人透露廉署受查人身份係違法嘅，一經定罪，最高可以判監一年同罰款。林卓廷咁公開話「某人」俾廉署調查緊，罪嫌其實相當之重。
政客觸犯有關法例而被定罪，並非無先例可循，之前社民連嘅吳文遠公開宣稱政府某官員正被廉署調查，結果就被檢控同被判監四個月（吳文遠正向終審法院上訴）；林卓廷同吳文遠唔同嘅地方，在於林卓廷除咗係立法會議員之外，佢之前仲係一個廉署人員，對於廉署保密嘅要求同相關法例，應該熟過一般人好多，依家佢涉嫌知法犯法，如果被調查甚至被定罪，計正應該判罰得更重！
追究政客 彰顯法治
近半年，香港法治屢屢受到挑戰，除咗有暴徒不斷犯法「打砸搶燒」外，政客不斷煽動抗爭，其實亦都係法治受到破壞嘅一個重要原因。林卓廷作為立法會議員、「前廉署人員」，喺呢個時候仲涉嫌「以身試法」，如果執法部門唔嚴肅處理、調查，可能以後就無人會理會廉署嘅保密要求同相關法例。仲有兩星期就係農曆新年，廣男希望新一年，社會可以將違法人士尤其係涉嫌犯法嘅政客「繩之於法」，彰顯香港極為重要嘅法治精神！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論