盲反派「籌款方法」層出不窮，但好多都俾人質疑「抽水」甚至「掠水」；近期頻頻為涉嫌違法、有違專業操守教師「出頭」嘅教協，噚日就召開記者會，宣布成立「訴訟及緊急援助基金」，並發起眾籌「支援」因為黑暴運動而被停職或離職嘅教師。面對教協嘅眾籌行動，囍雨比較小心眼，即時反應係，盲反派政客又籌錢，信唔信得過呢？
教師因何時被「停職」？
教協搞眾籌，囍雨就唔喺度幫佢哋「宣傳」詳情喇，但佢哋話要幫啲被停職、離職嘅教師，大家首先要搞清楚一個問題，就係相關教師為咩事被停職甚至需要離職先？教協作為盲反派嘅中堅分子，當然秉承盲反派「講啲唔講啲」嘅作風啦，等囍雨話俾大家聽，啲被停職或者要離職嘅教師，佢哋當中有人涉嫌喺黑暴運動中犯法，有人違反專業操守例如發表仇恨言論；對於呢啲「有問題」教師被停職甚至離職，囍雨想問下教協，到底係咩教師有問題，定係佢哋俾人「打壓」？搞清楚先好喎！
盲反派「紀錄不良」
至於教協要為啲「有問題」嘅教師籌錢，包括支援佢哋生活甚至「打官司」，大家除咗要認清教協偏袒「有問題」嘅教師之外，最好仲要睇下盲反派以往籌款嘅「不良紀錄」。例如支援抗爭者嘅「612基金」，前兩日先俾人踢爆佢哋係最新一份財務報告入面，將一啲支援項目嘅數額隱藏咗，仲將一啲俾人鬧到飛天、資助盲反派「搞活動、租音響」嘅開支成個item刪走，當中係咪有咩古怪，「612基金」都好似未有交代。另一個支援抗爭者嘅「星火同盟」，更因為涉嫌「洗黑錢」而被警方「拉人封舖」，單單係呢兩個支援黑暴運動嘅「基金」，已經令人十分懷疑，依家教協仲要整多個，會唔會又出問題呢？
黑暴運動持續半年有多，支持盲反派嘅人士，好多「出錢又出力」，但「出到」今日，當盲反派啲「基金」一個又一個出問題，大家如果繼續捐獻，會唔會啲錢相當部分用咗嚟做行政費、手續費，甚至用咗嚟幫返啲盲反派政客，真係講唔埋；囍雨又係果句，捐錢與否，絕對係個人自由，但如果一啲「紀錄不良」嘅政治陣營不斷籌錢又不斷出問題，大家真係要小心留意！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論