近排睇新聞，唔知大家有冇發覺，大批喺黑暴運動中涉嫌違法嘅被捕人士被陸續送上法庭，例如前日有一名19歲女生因為堵路以及藏有鐵鎚、摺刀等物品，喺法院提堂後唔准保釋；噚日又有關於舊年9月一場遊行中被捕96人被控暴動罪嘅消息，而早幾日仲有一單，一名22歲青年因為喺示威期間藏有汽油彈被判刑一年。廣男就喺度諗，黑暴運動由之前暴力事件遍地開花，到之後減弱為「野狼式」犯案，依家係咪意味住事態發展又進入到一個新階段呢？
越來越多違法者被捕被起訴
有分析意見就提出，隨住暴徒暴力規模不斷縮細，警察搜捕力量增強，將會有更多喺黑暴運動中涉嫌犯法嘅人士被捕被起訴。廣男今朝就見到警方又公佈，拘捕咗5名男子，涉嫌舊年10月喺九龍塘港鐵站其中一個出口縱火。順住呢個發展推斷落去，大家可以預料，當涉案人士陸續提堂，好多有關暴徒嘅犯罪事實同細節都會陸續被公開。
其實按照以往規律，廣男都好相信，之後必定會出現越來越多暴徒喺法庭求情、要求減刑，甚至為咗自保而潛逃，又或者篤灰、轉為污點證人等。廣男就話，當呢啲現象、事例越來越多時，對於遏制黑暴絕對係好事，因為暴徒之間嘅互相猜忌、不信任會漸趨劇烈，一定程度上必定進一步打擊黑暴士氣。
幾時見過政客仔女被拉被告？
其實每次睇呢啲新聞，廣男嘅心情都好矛盾，一方面會因為有涉嫌違法者受到追究、懲治而覺得大快人心，但另一方面，見到好多被捕被起訴者都係後生仔、年青人，又的確令人惋惜、唏噓。老實講，佢哋之中好多人當初可能都係因為被誤導、被煽動而參與暴力違法，但如今就可能因此面臨牢獄之災，甚至前途盡毀。或者大家此時更加應該深思一下，當一批大好青年成為炮灰、爛頭卒嘅同時，又有啲咩人從中得益呢？廣男就話，咪就係有一批成功躋身區議會名利雙收嘅「新科區議員」，以及叫人衝、自己鬆，然後坐收漁利、大抽政治水嘅盲反政客囉！
廣男喺度真係好想再奉勸班後生仔，唔好繼續「太傻太天真」啦，依家如果再聽人講什麼「和勇一家」，你係咪仲要信？所謂「齊上齊落」，原來係「我上任、你入獄」，又係咪值得？自己真係要好好諗清楚！其實有啲道理好簡單，大家有冇見過果啲煽暴媒體高層、盲反派政客，去警署保釋佢哋自己嘅仔女？又有冇見過佢哋嘅仔女因為參與黑暴運動，而被帶上法庭嘅犯人欄？
請Follow我們的YouTube頻道：
下載我們的手機應用程式，收看第一手精彩內容：
評論