俗語有云「斷估無痛苦」，平常人喺平常時候，好多嘢都係靠估，但如果係公眾人物例如傳媒人、立法會議員，講嘢就要好小心，因為如果無證據而亂咁「屈」人，就算澄清返都好難補救。日前立法會議員毛孟靜公開稱「疑似卧底警察扮示威者搞破壞俾人識破」，佢就收到警方去信，表示對佢嘅失實指控強烈不滿，批評佢罔顧事實，發表誤導及不負責任評論；而毛孟靜就回應稱，自己只係用「根據報道」或「據稱」等字眼，話警方無引述其受訪內容。廣男覺得件事其實好簡單，係咪只要凡事加上「質疑」、「疑似」、「據報」等字眼，就講乜都得先？
無實據下的「指控」
如果毛孟靜嘅「據報論」能夠成立，或者因為「曾有市民提及XXX」，就能夠質疑警察扮示威者作破壞，咁大家以後真係可以大大聲咁「質疑」喇！例如喺呢幾個月嘅黑暴運動入面，「好多市民」都質疑過暴徒收錢「做嘢」，甚至係收外國勢力錢「做嘢」，套用返毛孟靜嘅邏輯，大家絕對可以放膽質疑，只要學毛孟靜咁，加返「據報」、「有市民話」、「質疑」等字眼，就好「穩陣」㗎啦！
隨口舉多個例子，暴徒喺去年7月1日衝擊立法會，網上瘋傳一張圖片，並有好多人話毛孟靜細仔有份衝擊立法會甚至入去搞破壞，如果再次套用毛孟靜嘅邏輯，咁大家就算見到毛孟靜本人，係咪都可以指住佢，然後大力質疑「有人話你個仔係暴徒，你係『暴徒之母』」呢？
警方早澄清 毛孟靜不知？
其實，喺1月1日元旦遊行當日嘅下午大約5點鐘，警方已經公開澄清過警察無破壞過銀行，係有人誣衊警方、製造假消息，而毛孟靜就喺當晚大約11點鐘喺社交平台出Post，用hashtag指有疑似「臥底警察扮示威者搞破壞俾人識破」；毛孟靜作為議員、前傳媒人，佢發表呢啲指控言論前，有冇睇到警方澄清，有冇向警方了解過？如果無，即係無查證就抹黑警察？咁呢個立法會議員，講嘢都相當「負責任」下喎！
作為公眾人物，講嘢尤其係指控他人嘅時候，講嘢前應該諗清諗楚，如果加句「疑似」、「據報」就可以「噏得就噏，屈得就屈」，咁以後無人講嘢需要負上言責啦！
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論