自從爆出用籌款俾盲反派搞活動、租音響之後，「612人道支援基金」（下稱「基金」）一直被批評「籌錢益自己友」；近日，「基金」發表半年報告，信託人何秀蘭更坦言「基金壓力俱增，情況不樂觀」。囍雨抱住一夥「好奇心」睇下「基金」盤數，發現當中有不少古怪現象，包括一啲本來有列明開支嘅項目，再無列明金額，更出現有帳目開支疑似「被消失」嘅情況，到底「基金」係咪有咩想隱瞞公眾呢？
「基金」的「古惑帳目」
一如以往，「基金」發表報告果時都將一啲分類帳目列出嚟，但囍雨睇唔明，佢當中所指嘅「人權維護支援」項目同「倡議及調查」項目，到底實際包含咩項目、咩開支呢？之後囍雨睇相關嘅工作簡報，發現例如「6月23日立法會示威區法律講座 音響開支」等項目，以往應該係有列出用咗幾多錢嘅，但喺最新一份工作簡報，就無再列出呢啲「項目資助」用咗幾多錢，係咪「基金」負責人想隱瞞啲咩？定係已經撇帳？
最吊詭嘅地方係，「基金」之前俾人炳到七彩，係因為佢哋曾經資助盲反派「租音響」，涉及款項超過廿萬元，但喺今次份工作簡報，唔單止無列出相關「租音響」開支，直頭成個「6月16日遊行及籌款 音響開支」項目唔見咗；本來相關項目嘅編號係「4」，份工作簡報有關「項目資助」部分得「1」、「2」、「3」、「5」等等，係咪「基金」嘅負責人有心令相關嘅帳目「消失」？定係有其他原因呢？呢件事實在耐人尋味！
「基金」必須交代清楚！
睇新聞報道，「基金」講到自己財政狀況「好唔樂觀」咁款，但囍雨睇佢盤數，覺得「基金」必須要交代清楚帳目，例如所謂「人權維護支援」項目同「倡議及調查」項目，用咗超過130萬元，但實際啲錢用咗喺咩項目，每個項目用咗幾錢呢？點解以往有公開過款項細節嘅支援項目，依家唔再公開款項細節呢？更重要嘅問題係，點解有俾人批評過嘅帳目開支（「租音響」）會疑似成個項目「消失」咗？呢啲問題唔釐清，「基金」想取信於市民，實在係有難度！
綜觀「基金」帳目同負面新聞，囍雨唔敢話「基金」呃人，但佢哋嘅帳目，的確有可疑之處；或者，因為「基金」由盲反派發起，本身已經令人「唔安心」啦！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論