一場修例風波，反映出教育界嘅千瘡百孔，有教師發表極度惡毒嘅仇警言論，有教師涉嫌參與暴動或非法集結被捕，甚至有教學助理涉嫌製造炸彈；面對教育界嘅嚴峻問題，教育局著手處理教師涉嫌違法同有失專業操守嘅問題，但就俾盲反派例如教協抹黑為「清算」、「白色恐怖」。教育局處理有關問題教師叫「清算」？教協呢啲到底係咩道理？
教師犯事 不能停職？
教協對於教育局嘅指控，教育局已經發聲明，嚴正地指出教協歪曲事實及教育局局長楊潤雄嘅言論，更特別指出教協稱教育局無向涉事教師提供資訊，無俾佢哋申辯權利完全係不符事實，對於教協嘅指控，囍雨覺得教育局已經解釋得好清楚，反而有一啲大原則，囍雨覺得一定要講明白，當中包括有教師出問題，教育局係咪應該不作為。
當教協不斷聲稱唔應該停教師職嘅時候，大家又要問下教協，教師如果喺暴力衝突現場而又涉嫌違法被捕，咁唔停佢職，俾佢繼續教學生，會唔會對學生有不良影響，或者將違法訊息傳遞俾學生？至於散播仇恨言論嘅教師，俾佢哋繼續教，咁佢又會唔會向學生宣揚仇恨言論？如果有教師同學生講「警察死全家」，甚至有意無意叫啲學生去抗爭，而教育局選擇「不作為」，咁教育局就係失職！依家教育局著手處理事件，唔止唔係咩「白色恐怖」，甚至有人話已經遲咗做嘢！
教協 你願意與暴徒割席嗎？
成件事最令人氣憤嘅，係教協好似從來都同一班涉嫌犯法嘅教師「同行」，囍雨睇過幾份教協嘅聲明，好多時譴責暴力就「輕輕手」，攻訐政府就「大大聲」；其實對住教協呢啲「講一套、做一套」嘅團體，大家只需要問教協，教協願唔願意嚴正譴責暴徒「打砸搶燒」、殺人放火嘅行為，同埋公開同所有暴徒割席？如果唔願意嘅話，教協連最基本嘅公義都唔顧，仲好意思抹黑處理黑暴入侵校園嘅教育局？難怪向來溫和嘅教育局，都要鬧教協歪曲事實。
講真，雖然教協名義上係一個教師工會，但囍雨橫睇掂睇，佢都似係個100%嘅政治組織多啲；教師涉違法，教協可以唔理教師行為、操守問題，用「枉為人師」四字形容佢哋就最貼切。講開又講，教協葉建源近日口口聲聲話匿名投訴教師「不可以追查」，囍雨真心懷疑葉建源嘅判斷力，一個投訴最重要嘅係投訴事宜係咪事實，邊個投訴根本就係次要；或者教協、葉建源等，講咁多嘢例如「教師可在私人領域發表意見」等等，講到尾，又係不顧事實，玩偏袒包庇啫！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論