新年伊始，但香港沒有好開始！民陣噚日搞嘅元旦遊行再度引發暴亂，遊行開始冇耐，一批蒙面黑衣暴徒就四處破壞，佢哋趁機打砸商舖、堵路縱火、焚燒匯豐「銅獅」及櫃員機、甚至塗鴉法院侮辱法官。成個所謂遊行又變成民陣「搭台」、暴徒「表演」。新年嘅第一天，就喺民陣、盲反派政客以及黑衣暴徒一唱一和之下，拉開新年第一戰，繼而變成新年第一亂。當啲「示威者」不斷高叫佢哋嘅「願望、訴求」之時，囍雨又要問下，仲有咁多市民渴望回復安寧、秩序嘅新年願望，又有冇可能實現呢？
政客牽頭 暴徒隨後
囍雨噚日睇新聞，感覺上成個所謂遊行，基本上就係為緊隨其後嘅暴力破壞而做嘅「前戲」。遊行起步，就有一眾「新科」盲反派區議員以及亂港政客牽頭，行咗冇幾耐，一批黑衣人就已經按奈唔住，現場所見，當遊行隊伍去到銅鑼灣一帶，已經有大批黑衣人沿途傳物資，似係要為「開戰」作準備。
之後一批暴徒率先喺灣仔一帶發難，以區內滙豐銀行作為攻擊、「復仇」目標，又喺該行圍板噴寫「星火七千萬」、「星火之仇不得不報」等字句；附近另一間滙豐理財易中心玻璃亦被打爛，十一部櫃員機全數被破壞。除咗滙豐之外，附近一帶嘅中資機構、銀行、目標食肆、咖啡店，亦都難逃劫數，一併被暴徒「順便裝修」。
警方鑑於形勢，喺5點半左右要求民陣終止遊行、疏散人群，但暴徒完全無視警方警告，更群起而攻之，又喺銅鑼灣、灣仔及中環以雜物堵路，連中環滙豐總行門口嘅標誌性銅獅子都被暴徒噴紅油塗污，並隨即淋易燃液體點火「私了」。至當晚九點，暴徒仍未收手，分別喺銅鑼灣、中環再度集結，期間又破壞港鐵中環站一個出入口，並向站內投擲磚頭雜物同放火。另外一批暴徒再度去到高等法院塗鴉，在外牆噴寫侮辱法官嘅字句。最終警方要出動催淚彈、水砲車驅散暴徒。
民陣、政客與暴徒同行
講真，元旦遊行暴力收場，囍雨就話幾乎係意料中事，因為按照民陣「往績」，搞親遊行、集會，幾乎最後都變成暴徒「唱主角」，市民大眾對於呢個套路可以話已經「見慣不怪」！但當警方出於安全考慮終止遊行，民陣反而攻訐、指摘警方、政府「旨暴製亂」、「侵犯市民集會權利」時，囍雨又要請大家反複質問民陣，佢哋有冇譴責過暴徒暴力？有冇表態同暴徒割席呢？當初警方批出「不反對通知書」，就提出請民陣安排糾察員協助維持秩序，大家噚日又有冇見過「相關人員」呢？囍雨就真係唔覺有啦！對於遊行演變成暴力衝突，咁大家又要問民陣一句，究竟佢哋係無力維持秩序，定係根本無意維持秩序呢？
囍雨就話，民陣也好，以至一班盲反派政客又好，根本都係與暴徒「並肩同行」；「和平」遊行只不過係幌子、口號，遊行之後嘅趁機破壞、打砸燒先至係「戲肉」、係盲反派搞遊行集會嘅本質。所以如果大家下次又見到民陣話要搞遊行，應該明白佢哋想做咩啦！尤其甚者，當啲遊行集會變成衝突，有人受傷、被捕之時，果班始作俑嘅政客又做緊乜？大家不妨又自己諗下。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論