「廉署保密，密密實實」呢句說話，相信廣男嘅同代人或者上一代人都耳熟能詳，其實如果有人亂咁爆廉署調查事宜，例如話「某某人正受查」，隨時觸犯咗《防止賄賂條例》，監都有得坐，但唔知點解硬係有人要「以身試法」，社民連主席吳文遠係一個例子，最近民主黨立法會議員林卓廷亦涉嫌犯下有關罪行。廣男就喺度諗，如果林卓廷真係犯咗法，佢作為「前廉署調查員」，係咪罪加一等，應該俾法庭判罰更重呢？
某警司正「受查」？
事緣係咁嘅，喺日前一個記者會上面，向來喪抽「政治水」嘅林卓廷，就無端端話7.21事件警方調查緊，當晚帶隊去元朗南邊圍嘅警司游乃強係事件中一個疑犯，聲稱「廉署係查緊佢佢㗎，公職人員行為失當罪呀！」嗱，問題就喺度喇，點解林卓廷知道游乃強俾廉署查緊呢？同埋披露「受查人」資料係犯法嘅，廉署係咪要開個file查下林卓廷？林卓廷係咪好似之前咁當正自己係「廉署代言人」，所以今次又講咗啲涉嫌違反防賄條嘅說話？
根據法律界人士嘅講法，《防止賄賂條例》第三十條列明所有向廉政公署舉報的案件，必須保密，如有人透露有關資料，即屬違法，一經定罪，最高可被判罰款兩萬元同監禁一年；綜觀新聞資料、林卓廷自己講嘅嘢以至法律界人士嘅分析，林卓廷嘅罪嫌確實相當之大，之前吳文遠公開披露政府官員「正被廉署調查」，最後亦被裁定犯下相關罪行同被判入獄四個月，依家仲等候上訴。如果執法人員公平對待唔同政客，林卓廷極可能「罪責難逃」。
「初級調查員」 罪加一等
廣男必須要強調，林卓廷同其他人包括吳文遠有唔同嘅地方，就係除咗佢嘅立法會議員身份，佢之前仲係一個廉署人員，就算佢之前喺廉署只係「初級調查員」都好，佢應該好清楚任何人要保密廉署調查資料，一在於要唔想被調查者有機會毁滅證據，二唔想俾被調查者「畏罪潛逃」，三則係要顧及受查者嘅名譽；佢依家公開聲稱某某正被廉署「調查」，仲講明人哋涉嫌犯下某罪，大家絕對可以話林卓廷知法犯法，罪加一等。
2020年，社會想撥亂反正，除咗要支持警方嚴正執法外，對於涉嫌違法嘅政客，都一定要追究到底。否則，政客永遠只會成為暴徒嘅後盾，繼續喺度作浪興波！
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論