之前有大學調查指接受「違法達義」（為了爭取社會公義，必要時不遵守法律是可以接受）嘅人多咗，唔同人有唔同嘅解讀，有人認為咁係因為盲反派政客不斷煽動人違法造成呢個惡果；有人亦因此以「感到自豪」，戴耀廷就係其中之一。佢今日又喺《生果報》撰文，稱〈公民抗命正在壯大〉，指抗命意識由2013年開始傳播，今年的支持度比2014年還要高。講真，一個所謂法律學者煽動人犯法，然後仲好似好「自豪」咁話俾人聽多咗人「接受」違法行為，呢啲算唔算係恬不知恥呢？
違法達義始作俑者
可能對於戴耀廷而言，有關大學調查令佢「倍感高興」，但廣男想講，佢所高興或欣慰嘅地方，正正係香港人最不齒佢嘅地方。2013年1月，佢發表咗第一篇關於「佔領中環」嘅文章後，喺往後嘅時間，佢就不斷向社會灌輸「違法達義」嘅概念，最終引發咗2014年9月尾發生嘅「違法佔領」事件，香港人足足被折騰咗接近80日。一個教人犯法嘅人，依家仲懶係威咁話俾人聽「多咗人接受犯法」，呢個「違法達義」始作俑者，其實都幾唔知醜。
根本不是「公民抗命」
當戴耀廷係咁講「公民抗命」嘅時候，廣男仲想指出一點，戴耀廷實質所提倡嘅，根本就唔係「公民抗命」！如果係真正嘅「公民抗命」，首先要恪守非暴力嘅和平原則，但無論係違法佔領抑或今次黑暴運動，根本完全背離咗「公民抗命」嘅非暴力原則，咁點稱得上「公民抗命」呢？
仲有，就連戴耀廷自己引用過嘅大法官，都講過「公民抗命」唔可以造成過量破壞，其他學者或者社會知名人士，亦點出過「公民抗命」係要坦誠承擔罪責，呢啲嘢，違法佔領或者黑暴運動嘅策劃者、參與者根本都做唔到，仲好意思講「公民抗命」？如果要講「公民抗命」，請啲犯咗法嘅人，勇敢地承擔罪責，唔好一邊唔認罪，一邊又話自己「公民抗命」！
其實戴耀廷講咁多嘢，都係想合理化違法者一切嘅暴行，但良知話俾我哋聽，無論諸如戴耀廷嘅政客講得幾好聽，都改變唔到違法者損害法治、傷害他人嘅行為本質；戴耀廷作為「法律學者」，剩係識喺度塗脂抹粉，社會更應該嚴厲譴責佢！
原圖：Wenweipo
請Follow我們的YouTube頻道：
下載我們的手機應用程式，收看第一手精彩內容：
評論