每年一月一日，都是盲反派舉行元旦遊行的「大日子」，民陣聽日照例舉行遊行，今年遊行目的包括反對警察加人工、嚴防政權「清算」等，民陣召集人岑子杰稱政府已經開始「秋後算帳」，向教育界施壓以及指控「星火同盟」洗黑錢。囍雨唔明白，如果教師涉嫌違法或者有違操守，處理教師問題算係「清算」？同理，如果「星火同盟」有洗黑錢嫌疑，查佢哋又算係「清算」？
先弄清楚教育界問題
對於教育界嘅問題，坊間因為盲反派政客嘅誤導，唔少人都以為政府喺度打壓緊教育界；但囍雨希望大家明白，依家教育界嘅問題，係有教師或者教師助理涉嫌違法甚至參與暴動，又或者係有違專業操守，教育局出面處理問題，唔係咩「清算」或者打壓，而係作為負責任嘅教育部門，無可能任由「有問題」教師為所欲為。如果咁都唔得嘅話，大家就要問下盲反派包括岑子杰，係咪要俾教師喺校外參與激烈抗爭，校內散播仇恨言論、慫恿學生犯法先叫做「自由」或者「唔打壓」呢？連是非黑白都想混淆，絕對係盲反派政客嘅一大特色！
至於「星火同盟」嘅問題，其實警方或者其他法律界人士已經解釋過，「星火」戶口本身係一間無乜運作或者現金進出嘅公司，喺近半年間有大量現金「出出入入」，仲要有錢用咗嚟買大額投資性嘅保險，因此有洗黑錢嘅嫌疑；如果話警方唔可以查「星火」係因為「星火」支援反修例行動嘅被捕人士，咁咪即係支持反政府嘅公司、團體反而有特權，不能接受任何調查？道理一樣講唔通。
繼續轉移視線
其實，當盲反派搬一堆「堂而皇之」嘅藉口出嚟叫人遊行果時，大家應該要明白，好多嘢都只係盲反派政客轉移視線嘅技巧。教育界出問題，佢哋就掉返轉話政府「處理」有問題；「星火同盟」戶口有可疑，甚至有資助違法行為嘅嫌疑，佢哋就覺得警方調查先係有問題。更重要嘅係，過去幾個月暴徒打砸搶燒、殺人放火，佢哋就完全唔提，到底邊個先有問題，佢哋應該心知肚明。
最後一點，就係佢哋聽日嘅遊行會唔會和平仲係未知之數，有消息指有暴徒已經預備好聽日會搞事；囍雨就睇下，出咗名「和理非」嘅民陣，聽日到底係盡力維護和平，定係又搭台俾暴徒搞事！
原圖：RTHK
請Follow我們的YouTube頻道：
下載我們的手機應用程式，收看第一手精彩內容：
評論