教育局局長楊潤雄日前接受內地媒體訪問，表示如果學校唔配合對教師進行調查，當局有權撤換涉事學校校長；一如所料，盲反派對楊潤雄一番說話反應「極大」，一時話教育局製造白色恐怖，一時又話教育局要求校方同校長配合政府嘅「政治任務」同立場，係以言入罪等等。囍雨對於呢啲回應，剩係想問兩個問題，如果有教師涉及違法或者有違專業操守，校長有冇責任處理先？如果校長有責任處理而唔處理，又係咪失職先？
不是政治問題
對於有教師涉及違法行為或者有違專業操守，囍雨必先要指出，呢個唔係政治問題，亦唔係政府立場問題，而係關乎教育工作嘅重要問題！如果有教師涉及違法，校長無可能唔處理，就如有教師倘若涉及性罪行一樣，校長都唔以因為一句「無罪推定」而唔去正視問題；至於有違專業操守例如偏頗地教育學生或者散播仇恨言論，教師本身有責任，校長亦要做好監察工作，校長嘅責任本身就係不可推卸。
進一步去講，如果校長眼見教師有問題，無論係涉嫌違法定專業失德，校長選擇唔處理、唔配合教育局調查嘅話，咁教育局作為管理教育事務嘅政策局，點解處理校長問題就係白色恐怖呢？囍雨反而認為，校長唔處理有問題教師，係失職；而倘若教育局唔處理失職校長，同樣有問題！
政客勿轉移視線
當盲反派政客不斷高舉「白色恐怖」嘅旗幟時，其實呢班盲反派政客，根本就係喺度轉移緊視線，問題嘅重點，在於點樣嚴肅處理有問題嘅教師，但問題去到政客手上，就變成教育局嘅「問題」，大家應該問下教協馮偉華或者教育界立法會議員葉建源，佢哋係咪唔贊成處分有違專業操守嘅教師？係咪要撐涉嫌違法嘅教師？又或者講白啲，佢哋係咪為咗政治目的，要包庇有問題嘅教師先？當一個教育團體不問是非，而要去攻訐處理問題嘅教育部門，只能夠講教協係一個「政治先行，顛倒是非」嘅政治團體。
教師每日接觸無數學生，佢哋有冇涉嫌違法，有冇違反專業操守，係大是大非問題；佢哋有問題，校長就要處理，而如果校長唔處理，教育局就要處理！包庇黑暴，本身已經令人不齒，盲反派政客縱容黑暴入侵校園，令人更憤怒！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論