香港電台超支500萬元，其顧問團希望政府增撥資源，全國政協副主席梁振英提出政府應該審查港台帳目，衡工量值。要求審查政府部門包括公營機構帳目，其實係平常不過嘅事，不過盲反派尤其係盲反派媒體《生果報》就如臨大敵，稱梁振英「在港台背後插刀」。港台嘅種種問題，近年已經有好多人討論，廣男覺得大家睇港台，應該先睇佢作為一個公營廣播機構，用香港人嘅錢，係咪用得其所，發唔發揮到佢嘅公營廣播機構作用。
政府部門 當然要「管好盤數」
無論是政府部門，抑或是私人機構，唔同部門都要個預算，港台作為政府嘅機構，佢超支到底係「政府問題」所以要幫佢填數，定係佢自己駛大咗先？警察要超時工作補水，係因為佢哋要應付無日無之、不斷將暴力升級嘅暴徒，咁港台又為乜要超支而要香港人幫佢埋單？係因為佢哋不斷有報道針對政府，所以「值得」增撥資源？
所謂衡工量值，廣男相信任何政府都需要做，港台作為一個長期為人所垢病嘅公營廣播機構，更值得好好去審計。廣男無意貶抑港台嘅「價值」，但審計署曾經就港台發表過報告，港台電視31/31A嘅收視率偏低，平均收視率平均為0.1點，即6,400名觀眾；收視低得咁緊要，社會各方要求對港台「衡工量值」，其實非常合理，等於電影投資者，投唔投資一部電影，多多少少都要考慮下票房一樣。
盡力為市民報道「逆權運動」
根據《生果報》嘅講法，港台新聞部因為「過去半年採訪『逆權運動』這重大事件不得不增加人手與資源，令整體開支超出年度預算500萬元」、「在這樣的時候，任何愛惜香港、重視新聞自由的人都會希望特區政府能酌情增撥資源予港台新聞部，好令它能履行公共廣播機構的職責」；換句話說，港台係因為盡力為香港人報道「逆權運動」，所以先超支，大家又要問一問《生果報》，《生果報》咁講，係咪想幫港台「表明」，港台所報道嘅係「逆權」新聞？如果係嘅話，一個公營廣播機構「逆權」，點解仲要問政府攞番錢咁有趣？
前幾日，警察公共關係科向港台處長梁家榮發信，澄清警方喺22日嘅中環集會無主動使用武力，投訴港台報道與事實不符，會誤導聽眾；港台係咪「中立」，廣男相信大家心中有數，但如果《生果報》都為港台「加持」，稱佢盡力為港人報道「逆權運動」，市民起碼可以見到，港台喺「逆權運動」嘅努力，係得到《生果報》「充分肯定」嘅！
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論