日前香港大學比較法與公法研究中心發表文章，大力倡議特赦暴徒，引嚟社會嘩然，囍雨抱住凡事都「研究下」嘅心態，鼓氣勇氣睇下呢份由法律學者所撰寫嘅〈淺論香港特赦〉，一睇之下，啲論調真係嚇一人跳，內文除咗處處偏袒暴徒之外，甚至連「特赦促進共融」等說話都講得出口；如果特赦能夠促進共融、和平，所以要特赦包括犯下重罪嘅人，咁以後個個都因為「政治理由」而違法，社會仲有冇法治可言？
古怪論調多籮籮
呢篇「特赦」文章，囍雨先唔講佢嘅「水準」，但佢入面有啲論調，確實非常值得商榷，包括警民衝突持續升溫「也是因為政府使用過度武力導致暴力升級」、「特赦有助於確保立即的和平」、「特赦促進共融」、「特赦本身亦合乎中國傳統」等等，睇到囍雨呆晒，重點在於佢講到政府有錯而暴徒「被迫升級」咁！
先講「政府使用過度武力」嘅問題，囍雨唔知寫呢篇文章嘅學者有冇睇下啲暴徒幾暴力，係咪政府唔答應示威者訴求，佢哋就可以用暴力？同埋所謂「政府使用過度武力」，大家又要問下，如果無暴徒作亂，警察有冇需要動用武力先？一句政府唔充分回應、政府使用過度武力就想卸去暴徒責任？唔係呀？！
至於「特赦有助於確保立即的和平」、「特赦促進共融」嘅說法，同樣荒謬，呢啲學者如何推論出特赦有助於「確保立即的和平」？暴徒一直打砸搶燒，特赦佢哋係咪就停到暴力？佢哋唔係話「五大訴求，缺一不可」咩？至於「共融」嘅概念，可能因為囍雨唔係學者，學識唔係好夠，所以從未聽過特赦罪犯以「促進共融」嘅概念！最後，當呢班學者講中國傳統、儒家嘅時候，儒家講嘅「德主刑輔」，都無話唔要刑罰呀？如果講中國傳統，咁法家嘅「信賞必罰」，又係咪中國傳統呢？
這是人治 不是法治
講真，所謂要特赦暴徒或者其他違法嘅人士，一句講晒就係唔要法治要人治，如果今日因為「政治理由」而特赦暴徒或者違法嘅示威者，他日其他人一樣可以因為「政治理由」而違法，法治完全崩壞咁樣香港一定會大亂！當所謂法律學者稱特赦唔違反法治精神嘅時候，抱歉，囍雨覺得呢啲唔係法治，係專為放生暴徒而設嘅人治行為！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論