噚日單單喺油麻地，就發生咗兩宗劫案，根據警方公布的數字，今年一月到十一月，搶劫案俾去年同期多咗四成幾；對於明顯有匪徒趁火打劫嘅問題，囍雨留意到《生果報》喺報道、評論事件嘅時候相當有心思，一時就以頭版報道稱遇劫苦主稱「冇軍裝巡邏」，一時就喺社評話政府嘅「最驚人突破」係無視「本港搶劫案升28%、街頭行劫案上升44%」。對於《生果報》嘅「邏輯」，囍雨想問一句，暴亂不斷，分散警力，《生果報》真係覺得問題在於政府、警察而唔關暴徒事？
《生果報》顛倒是非黑白
對於《生果報》想將一系列罪案都「入政府數」，囍雨覺得有啲事實大家真係要清楚。全港大約有三萬名警察，除返開兩、三更，可能最多只係有一萬名警察同時喺十八區執勤（後勤及文職果啲都唔計喇），喺每區得幾百個警察做嘢，而且近期仲花費相當人力、精力用嚟應付示威、暴亂，依家有匪徒趁火打劫，好明顯就係黑暴運動所致，《生果報》所謂「冇軍裝巡邏」，擺明又係借機抹黑政府、警察。
相比之下，囍雨就覺得部分市民比起《生果報》更加明辨是非，例如今朝有電台聽眾，就表示其實依家周街嘅人都戴晒口罩，根本就好難區分邊啲係學生，邊啲係匪徒；囍雨衰啲講句，啲匪徒可能一身黑暴裝束去踩幾次線，「睇到定」先去行劫，唔好講話警察好難區分呢啲係反政府人士定匪徒，就算係遇劫商舖，班人未去到俾人打劫果刻，都好難知門外果個係匪徒定係「一般黑衣人」啦！
政府欠缺法律止亂？
其實，政府本身係有法律可以應對呢啲「人賊不分」嘅問題，政府之前為《禁蒙面法》立法，就係要令到啲人唔可以喺公眾集會、遊行蒙面繼而違法，但盲反派議員要入稟挑戰可以止亂嘅法例，結果就梗係一街繼續都係帶晒口罩、蒙晒面嘅人啦！黑暴運動係因，混水摸雨、趁火打劫就係果，囍雨覺得最奇怪嘅地方，就係《生果報》以至盲反派政客，到今日都唔敢譴責暴力，唔敢同暴力割席，依家佢哋仲想將矛頭指向政府、警察，更顯得佢哋心虛！
綜觀《生果報》社評，內文仲敢話警力都用喺「鎮壓和平示威」，大家真係要問下《生果報》，如果暴徒打砸搶燒、殺人放火都可以叫「和平示威」嘅話，呢個世界仲有示威係「唔和平」嘅咩？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論