騙徒手法層出不窮，政客包庇暴徒嘅手法，同樣「包羅萬有」。今日廣男睇新聞，見到違法佔領發起人戴耀廷喺《生果報》撰文，佢以〈星球大戰的啟示〉為題撰文，意指黑暗力量（Dark Force）「強大無比」，但與之對抗嘅叛軍最後都能夠「以小勝大」云云。睇完戴耀廷嘅鴻文，廣男嘅即時反應係，戴耀廷所講嘅「黑暗力量」，其實係咪講緊黑暴運動班暴徒先真呀？
用電影為黑暴「漂白」
無論盲反派班政客點為黑暴「漂白」，當中原理只得一個，就係凡係反政府做嘅，都係「正義的」；而凡係政府、警察做嘅，都係「邪惡的」。但當戴耀廷今次想用黑暗力量去比喻政府或者中央，廣男真心認為，黑色暴徒、喺背後推波助瀾嘅政客以至媒體，先至係名符其實嘅黑暗力量囉，暴徒半年多以嚟嘅打砸搶燒，令香港陷入前所未有嘅黑暗歲月，如果佢哋唔係黑暗力量，唔通會係殺人放火嘅「光明力量」？
細閱戴耀廷嘅文章，會發現當中既有荒謬之處，亦有可笑之處，例如佢以星戰第九集比喻為區議會選舉，又稱再下一集就係立法會選舉，仲話要睇下「到時候，我們就可以見到那些小飛艇怎樣發揮作用……去抵抗威權」，廣男就覺得戴耀廷同《生果報》老闆黎智英一樣，原來黑暴發展成點，或者啲年輕人點樣被捕、被撿控、被定罪都好，班政客都仲係記掛住選舉同選票，食「人血饅頭」食到咁肉酸，真係得戴耀廷先做得出！
又想煽動「港獨」？
當戴耀廷講到「當這最高領導人倒下，整個權力集團會頓時變得群龍無首，以弱勝強的契機就出現了。在這裏我就不再進一步解讀，大家心領神會就可以了」嘅時候，就令廣男聯想到，戴耀廷係咪又想講如果時機成熟，香港可以考慮成為「獨立國家」呢？所謂「心領神會」，除咗係奪權，廣男實在諗唔到有其他意思！
戴耀廷呢篇文章，有一點廣男覺得特別值得留意，佢聲稱「在對抗黑暗力量時，戰士不能變成與他要對抗的魔君一樣。即使你能消滅了它，但你也可能立時與它一樣成魔」；其實誠如廣男喺文章開首所講，黑色暴徒根本就係「黑暗力量」，即係「魔」，唔需要戴耀廷提佢哋唔好成「魔」，當戴耀廷呢個法律學者眼見暴徒破壞法治、打砸搶燒甚至殺人放火，而仲要喺度為黑色暴徒塗脂抹粉嘅時候，廣男只能講句，為咗政治，為咗奪權，諸如戴耀廷之流，根本無良知可言！
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論