反修例風波由六月到今日，其實唔少意見都認為學生們「前仆後繼」咁走上抗爭前線，係因為教育出咗問題，當中既有制度、課程問題，亦有教師煽動仇恨嘅問題；日前教育局表示過去半年有教師發表仇恨言論，使用偏頗教材，甚至已經有80名教師及教學助理涉嫌違法被捕，教育局要求學校將涉及嚴重違法事件而被捕嘅教師停職。廣男就覺得，停職不等於解僱，將涉事教師停職，可避免學生受到荼毒，對學校、社會都係好事，絕對唔係咩白色恐怖！
將涉事教師停職有法可依
根據教育局發俾全港學校嘅信件，其中一項要求學校將涉嫌犯事而被捕嘅教師停職，講明「被捕當然不等於最終被定罪，但《資助則例》已清楚列明，若個別老師已經或有可能涉及嚴重的刑事訴訟，或涉及嚴重不當行為，在符合《僱傭條例》相關規限下，學校可着令其停職」，楊潤雄仲舉例，譬如有教師牽涉性罪行，假如仲俾佢同未成年學生接觸，質疑咁樣能唔能夠保障學生安全。
對於教師涉嫌違法嘅問題，廣男同意被捕唔等於有罪，至於係咪停職，大家可以諗下，有啲教師或者教學助理可能係涉嫌暴動罪被捕，有啲就牽涉製造炸彈案，如果俾佢繼續履行職務，廣男唔相信佢哋會攞炸彈「炸學校」，但係，佢哋同啲學生相處嘅時候，會唔會將「違法達義」嘅訊息灌輸俾學生？會唔會有意無意間煽動到學生出嚟抗爭？學校作為教育學生嘅最前線，如果繼續俾涉事教師接觸學生，其實受到影響嘅，最終就係學生！
違反操守 同樣嚴重
至於教師違反專業操守嘅問題，教育局表明已經發信譴責或警告涉事教師，當中有一名官校教師更因為使用不當教材而被停職調查；其實對於教師有違專業操守嘅問題，大家一樣唔可以忽視。道理好簡單，大家都明白啲學生出嚟衝、出嚟抗爭，係因為佢哋覺得自己「做對了事」，但所謂「做對了事」，其實唔少行為都係犯法嘅，如果有失德教師喺呢個時候仲要「火上加油」，一時散播仇警言論，一時傳遞出「抗爭有理」嘅偏頗訊息，咁學生會唔會更有可能出嚟抗爭，成為《生果報》所講嘅「衝衝子」呢？教育界其實一早應該覺醒，唔可以俾學生淪為政治犧牲品；要處理教育問題，就必先處理教師涉嫌違法、有違操守嘅問題。有教師被捕，敲響咗教育界嘅警鐘，社會各界人士，實在不可不察！
原圖：中通社
請Follow我們的YouTube頻道：
下載我們的手機應用程式，收看第一手精彩內容：
評論