捐款俾盲反派？不了！因為太多經驗話俾我哋聽，捐款俾盲反派，往往都唔係好事，今日廣男睇新聞見到民主黨立法會議員許智峯，話要眾籌三百萬就幾宗「公眾關注」嘅案件提出私人檢控同循民事申請禁制令，第一個反應係，許智峯黨友林卓廷、尹兆堅之前炒作UGL事件借機籌咗二百幾萬元，到最後錢就用晒咁濟，最大得益者變咗可以借機去英國、澳洲「旅行」嘅林、尹。依家許智峯又玩籌款，大家要問下「有案在身」嘅許智峯，呢個係咪另有目的呢？

星火買保險 612租音響

嗱，唔係廣男對盲反派籌款有偏見，但盲反派籌款，成日都俾人揭發有問題。好似「星火同盟」咁，打正旗號籌錢幫「義士」，佢啲錢有冇來歷不明，係咪真係有「洗黑錢」，廣男就唔講住喇；如果佢哋啲錢係用嚟幫「義士」，點會有大額金錢用咗嚟投資個人保險產品，受益人仲要係間空殼公司嘅負責人？即係有咩得益，啲錢會去咗某啲人嘅手中？

至於「聲勢浩大」嘅「612人道支援基金」（下稱「基金」），情況一樣咁「恐怖」，之前有被捕者獲得政府嘅法律援助，但想請嘅律師團隊因為「限額制度」問題所以代表唔到佢，於是向「基金」求助，「基金」竟然拒絕仲要講風涼話；當時有人就篤爆過「基金」，話「基金」唔幫「義士」，但就批錢俾人搞「18區媽媽和理傾加油站」、大專學界去海外游說甚至係搞活動「租音響」，即係原來大眾捐錢俾「基金」，「基金」想幫邊個就邊個，「義士」未必一定幫，但「自己友」攞錢，感覺係容易啲！

許智峯要籌330萬元？

之前林卓廷、尹兆堅眾籌200幾萬元最後換嚟一場又場純粹俾佢哋出風頭嘅「政治騷」，今次許智峯話要籌330萬元「處理」「荃灣和西灣河發生的槍擊案、警員駕駛電單車撞向人、的士鏟上行人路撞向市民，以及禁止警方使用大陸製催淚彈」，大家要問下許智峯，提出私人檢控、申請禁制令，籌300幾萬元可以處理到當中幾多件「事件」，一單訴訟仲要係私人檢控，隨時都過百萬元埋單，依家許智峯話預計330萬元處理到五件事，廣男喺度諗，最後會唔會又變晒做大律師嘅「法律諮詢費」，但官司就打唔成呢？同埋大家仲要問許智峯，諗住搵咩律師，係咪搵「盲反派」嘅同路人承接呢？ 

原圖：RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app