噚日一宗懷疑「洗黑錢案」震驚全港！一直聲稱支援被捕「義士」嘅「星火同盟」，經警方調查後發現該公司有大量現金流出，而且用於購買大額保險產品，與該公司業務不相符，「活動」符合「洗黑錢」嘅特徵，所以凍結咗「星火」7,000萬元資金，同拘捕咗公司董事等4名男女。囍雨唔明白，如果係眾籌得嚟嘅錢，點解要用嚟投資個人保險產品呢？資金到底點嚟？而啲錢最終又會流去邊呢？警方真係要查清楚！
要調查資金來源及去向
據警方表示，佢哋基於一間空殼公司喺過去半年出現大筆嘅可疑現金交易而展開調查，該公司多年無交稅，但有大量現金出入同購買大額投資個人保險產品，同該公司業務根本無關，有洗黑錢特徵。而涉事戶口喺11月俾銀行停止運作，亦間接證明咗戶口「有古怪」，據報之後涉事人仲將錢轉入其他戶口。點解話「星火」似「洗黑錢」呢？囍雨認為有兩點值得留意，第一係「星火」有大量現金流入，第二則係佢哋將金錢用喺投資嘅手段俾人感覺似「洗錢」，所以警方形容佢哋有「洗黑錢」之嫌，做法合理，正如銀行見到一間空殼公司戶口突現有咁多交易、現金出入，都無可能唔起疑一樣。
對於「星火」被懷疑「洗黑錢」一事，囍雨認為有兩樣嘢必須查清查楚，首先「星火」籌咗8,000萬元，絕對需要追查呢筆錢嘅來源，當中有冇來歷不明、值得追查嘅款項存入？其次就係呢筆錢最終會流向邊度，如果筆錢真係有用嚟買受益人為個人嘅保險產品，係咪即係啲錢打個「白鴿轉」就乾乾淨淨咁入咗某啲人嘅手中？有人就總結，處理「洗黑錢」案，洗之前嘅錢同洗完後嘅金錢流向絕對係關鍵所在！
超市券有否資助黑暴？
另一個非常值得大家留意嘅問題，就係喺警方進行搜查同拘捕行動嘅時候，檢獲13萬現金、6支箭、兩支鐳射筆、一張16萬元超市現金券收據，涉及購買約3300張現金券，以及大量防護裝備，呢啲裝備係咪俾暴徒用嘅呢？呢啲超市現金券，係咪用嚟資助暴徒？如果兩者有其中一樣答案係肯定嘅，「星火」係咪仲涉嫌用不同方式資助暴動行為？之前警方講過喺啲遊行、示威現場作搜查時，往往喺啲示威者身上搜出裝備同現金券，到底關唔關「星火」事？「洗黑錢」係一回事，「星火」有冇份資助甚至策劃暴動，可能又係另一回事。「星火」理論上半年籌咗8,000萬元，依家得番7,000萬元，大家真係要問下，用咗果1,000萬元，到底去咗邊！
原圖：文匯報
請Follow我們的YouTube頻道：
下載我們的手機應用程式，收看第一手精彩內容：
評論