「黃色經濟圈」近期成為社會一個熱門話題，黃絲人士不斷吹捧「黃色經濟圈」，甚至有學者都聚埋一齊討論「黃色經濟圈」；今日廣男睇《生果報》，見到熱衷於攻訐政府、中央嘅《生果報》主筆都講「黃色經濟圈」，仲稱「政治寒冬更需要『黃色經濟圈』」，表示「黃色經濟圈」想法值得認真探究同試行。對於「黃色經濟圈」，廣男首先想問一個問題，如果香港經濟被黑暴徹底攬炒，啲黃絲自己生計都成問題，呢個「黃色經濟圈」，係咪仲可以持續呢？
失業多、經濟差 「經濟圈」何以為繼？
盧峯有一點講得啱，就係市民、消費者有選擇嘅自由主權同自由，所以廣男都覺得啲人要光顧黃店，係個人自由；但係對於「黃色經濟圈」，廣男想問下，依家經濟下滑成為事實，失業率創近年新高，有行業失業率仲高見6%有多，如果經濟再差落去，有人連飯碗都不保，咁仲有冇能力支持「黃色經濟圈」呢？
一個「經濟圈」要能夠生存到，即係入面嘅商號首先要有足夠嘅生意，喺香港，批發同零售業佔全港GDP佔4%，住宿同膳食服務又佔3.4%，與入境旅遊相關嘅總消費超過3,000億港元，入境旅遊喺2018 年為225,400 人提供職位（佔總就業人數的 5.8% ），少咗一大批內地旅客、外國旅客甚至本地消費者（姑且當果啲係藍絲消費者），「黃色經濟圈」係咪持續到，或者只係「暫時風光」而無以為繼，廣男實在有啲疑問。
「黃色經濟圈」只為分化港人
之前有人提過，話「黃色經濟圈」其實係唔可能自給自足，因為諸如食物、食物材料，甚至食水，其實都係來自內地，所以「黃色經濟圈」解決唔到供應層面嘅問題。唔係廣男要串咀，如果要搞「經濟圈」，啲黃店會唔會就算食物材料都唔喺內地入貨呢？如果係嘅話廣男「佩服」，不過唔知營運成本會高幾多。又或者，如果真係咁「型棍」，會唔會連東江水都唔用，徹底地建立「經濟圈」？
廣男就認為，「黃色經濟圈」作為一種經濟活動好，政治行動也好，其實「經濟圈」有一個好大嘅政治意味，就係要令「黃、藍」或者香港人之間分化落去，撕裂味道甚濃；對於「海納百川」嘅香港嚟講，係好事，定係壞事？相信心清眼亮嘅市民，心入面一定有答案。
原圖：RTHK影片截圖
請Follow我們的YouTube頻道：
下載我們的手機應用程式，收看第一手精彩內容：
評論