黑暴運動持續六個多月，唔少人認為今次暴亂反映出教育界嘅千瘡百孔，做教師嘅仇警、煽動學生，做學生嘅就一個又一個成為「衝衝子」，最令人心痛嘅，係有大學校長眼見暴徒喺自己面前，都唔敢譴責、割席；近日，《泰晤士高等教育》公布2019年嘅全球高等教育風雲人物，中大校長段崇智榜上有名，評選校長嘅記者仲讚段崇智為學生「挺身而出」云云。廣男實在唔明白，一個嚴格嚟講為暴徒「挺身而出」嘅教育工作者，真係值得成為教育界「風雲人物」？呢個到底係正面評價，定係反面教材？
校長冒險去「戰場」？
據傳媒報道，提名段崇智嘅記者表示喺新聞相片顯示，段崇智「冒住危險」去到猶如戰場嘅中大校園，試圖同示威者與警方達成和平協議，警方仲向段崇智發射催淚彈；記者又形容，段崇智事前已經接觸唔同學生，聆聽佢哋嘅不滿，同時呼籲停止暴力，即使被官方人士批評，都「仍然如一」。睇到呢度，大家有冇一種段崇智「被英雄化」嘅感覺呢？
有機構評選段崇智為教育界「風雲人物」，係某機構嘅事，但廣男想問，段崇智「挺身而出」去保護嘅，係咩人先？佢哋嘅身份只係「學生」？錯，因為呢班人當中，有唔少係有份破壞校園、堵塞公路、恐襲鐵路同向警方掟汽油彈嘅暴徒，一個校長去「保護」一班違法暴徒，廣男唔認為值得「嘉許」或者選佢做咩風雲人物。
沒有譴責暴徒的校長
誠如報道所指，段崇智的確曾經呼籲「停止暴力」，但作為教育工作者，應該教曉學生是非黑白對錯，佢有冇公開譴責過暴徒暴力，有冇同暴徒割席？如果一個教育者，只係一味為學生「挺身而出」，「承諾」支援涉嫌參與黑暴嘅學生，呢啲係教育工作者應有嘅風範？廣男就覺得，如果其他教育工作者都好似段崇智咁一味偏向袒護有問題嘅學生，就只會縱容出更多參與暴力示威嘅學生！
所謂教育，以教為先，但放眼今日香港，只有少數校長、老師公開表明學生唔應該參與暴力抗爭，唔應該以身試法，同埋「挺身而出」譴責暴徒；香港再係咁落去，下一代都被黑暴洗腦，香港仲有未來？恐怕到時香港已經被黑暴所侵蝕，下一代都變成政客反政府嘅「政治爛頭卒」。
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論