政治呢樣嘢，有時真係「一日都嫌多」，好似黃絲藝人何韻詩咁，之前先喺社交平台發過帖，批評美國總統特朗普「毫無道德」，但廣男前兩日喺Facebook，就見到佢同「香港眾志」黃之鋒「笑笑口」攞住有特朗普簽名嘅《香港人權與民主法案》（下稱《法案》）副本合照，好似接到「聖旨」一樣。廣男實在好奇，到底何韻詩係「反特朗普」嘅，定係特朗普支持者呢？一時話人無道德，一時又攞住有人哋簽名嘅文件副本合照，好矛盾下喎！

不擇手段生意佬？

數個月前，何韻詩喺Facebook分享一單新聞，內容係關於特朗普話中國想達成貿易協議，要先人道處理香港問題，何韻詩當時對特朗普嘅評語係「哈，又轉呔」、「只能講佢係一個不擇手段嘅生意佬，而咁啱佢地嘅拉鋸對我地多少有利，that’s it」、「向佢本人求救？不了。毫無道德嘅人，隨時賣咗我地都唔知咩事」。簡單嚟講，何韻詩批評到特朗普一文不值，甚至係一個「毫無道德」嘅人。

不過，政客（大家可以當何韻詩係政客而非藝人）轉呔，往往係好快嘅，當《法案》副本送到佢同黃之鋒手上嘅時候，唔知何韻詩係因為份《法案》，定係因為上面有埋特朗普簽名，就好開心咁同黃之鋒笑住嚟合照；之前話人無道德，依家又當人係「主子」咁，廣男只能夠講何韻詩立場飄忽，甚至可以話係無立場！

賣港仲要show off？

對於黃之鋒、何韻詩「賣完港」仲要show off嘅行為，有人形容為「賣港憑證」，廣男就覺得，其實美國簽署《法案》，或多或少都會對香港有啲影響，而且影響係負面嘅，當有政客笑笑口向外表示「賣港成功」，即係話呢班人表面上係為香港好，但所做嘅嘢，實質根本唔係想香港好，而係想香港衰；對住啲想香港衰嘅人，大家除咗譴責，記得他朝有日如果香港情況變差，係呢班政客有份造成嘅。

值得一提嘅係，何韻詩近年積極「為港發聲」，有啲人可能以為佢係「真‧香港人」，真心為香港；但廣男睇報道，指何韻詩其實係有加拿大公民身份，換句話講，嚴格嚟講，大家可以話佢係加拿大人。對一個加拿大人嚟講，香港好唔好，對佢重要咩？可能人哋只係食緊花生，等香港沉淪炸！ 

原圖：RTHK影片截圖

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app