盲反派一向視美國政要、政客為「老闆」，所以每當盲反派政客有機會見到外國政要，好多時都會「感謝」對方支持香港民主運動或者「關心香港」；日前公民黨立法會議員郭榮鏗就喺社交平台發帖，話自己應邀去咗美國副總統彭斯喺官邸舉辦嘅聖誕聚會，稱自己向對方感謝對「香港人嘅支持」，又話國際社會對香港嘅支持「非常重要」，擺出一副「多謝」對方干預香港嘅姿態。廣男想講，郭榮鏗一番說話嘅邏輯，極度「古怪」，而且甚有「賣港求榮」嘅味道。

美國可就香港狀況發聲？

根據郭榮堅嘅講法，「香港從來都是國際城市，如果要外國人一方面在香港投資，另一方面對香港事務噤聲，是不可能的」，咁大家就要問下郭榮鏗，係咪有人喺香港投資，就等於可以對香港內部事務發聲呢？套用郭榮鏗嘅邏輯，其實內地尤其係廣東省對香港嘅投資比美國人多，咁廣東省係咪要「多啲就香港事務發聲」？香港好多地產商喺本港極多投資，佢哋係咪又要積極喺香港「發聲」呢？呢種投資就可以「發聲」，甚至係干預嘅說法，廣男只能夠講一句，廣男真係唔係好明白！

可能郭榮鏗「賣港」日子唔夠其他盲反派政客咁「資深」，所以講出啲令人貽笑大方嘅「道理」；廣男就覺得，咁多地方嘅自由狀況不及香港，點解美國偏偏要為香港「發聲」呢？例如新加坡一定無香港咁自由，點解美國係干預香港而唔係干預新加坡？當中原因極度簡單，因為干預香港，某程度上就等於打壓中國；要遏制中國發展，幾乎係美國朝野嘅共識，依家諸如郭榮鏗嘅本港盲反派政客前仆後繼地叫美國「搞中國，搞香港」，人哋未必當佢哋係朋友，不過覺得佢哋好「利用」，應該就無錯喇。

誰侵蝕香港自由

廣男留意到，郭榮鏗喺社交平台嘅發帖仲有講中央「侵蝕香港的自由及法治」，大家又要問下郭榮鏗，依家邊個喺香港打砸搶燒，「私了」市民，嚴重妨礙他人自由呢？至於法治，郭榮鏗好似到今日都仲未同「殺人放火」嘅暴徒割席喎，仲好意思喺度講法治？大家真係要睇清楚，我哋嘅立法會法律界代表，原來係用包庇暴徒嘅方式嚟「守護」法治㗎！ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app