廣男呢幾日一路睇住浸會大學學生會長方仲賢，大鬧台灣民進黨「以港人鮮血換選票」單嘢嘅劇情發展，真係越睇越好笑。話說方仲賢早前拋出「人血饅頭」論之後，可能自知「不妙」，急急腳澄清之餘，仲親身飛去台灣道歉，搞到好似負荊請罪咁款。唔知係咪仲擔心「做得唔夠」，日前方仲賢背後嘅「香港大專學界國際事務代表團」又發咗篇帖文道歉解畫，點知就逐一「點名」篤爆有份「無私付出支持」香港黑暴運動嘅台灣組織。「大專學界」呢一招，究竟係鬼拍後尾枕？定係因為不忿「道歉」而懷恨在心？又或者係「做多錯多」？就真係得佢哋自己知喇，不過佢哋嘅「篤爆」就真係令大家大開眼界囉！仲話香港黑暴無大台無台灣黑手？！
「一夜間籌募大量頭盔」？
嗱，唔好話廣男作故仔，大家睇番大專學界嘅帖文，白底黑字清楚寫住：「感謝各台灣組織，包括台權會、邊青、基進及陸委會等，持續關注香港人士半年以來的努力及無私的付出」；「台灣對香港人的支援有增無減，自6月起大力以行動支持香港運動，不論是遠道以螞蟻搬家形式運送物資來港，一夜間為港人籌募大量頭盔。」不過最搞笑、亦最耐人尋味嘅係，廣男今朝再睇番篇帖文，就已經刪咗幾個台灣組織嘅名稱，大家又點睇呢個動作？廣男想講，呢啲咪就叫「此地無銀」囉！
大家睇完笑完，再稍稍細味下成件事，就會發覺其實內裡「信息量」好大，亦都變相令大家再一次睇清台灣政客組織、以至香港一啲所謂「抗爭團體」嘅真面目。例如台灣方面咁，對於香港嘅政治事件「有水即抽、用完即棄」，明眼人都睇得明喇！如果唔係，點會連方仲賢都「睇唔過眼」、一開始咁「義憤填膺」啊？！調番轉頭，大專學界其實亦都「半斤八兩」，平日就扮到幾咁「正義、偉大」，但只要一有不滿或者一言不合，隨時反咬你一口。
幕後「台獨」勢力現真身
另一個更大嘅問題，係今次事件令大家大開眼界，原來有咁多台灣組織「無私」支持香港黑暴運動；大家終於明白，暴徒咁齊整嘅full gear裝備係點得來，仲要喺「一夜之間」就做得到。如果仲有人話今次黑暴背後都係「自發、冇組織冇大台」，大家仲信唔信？值得留意嘅係，大專學界帖文中仲提到佢哋嘅「模仿對象」、一個叫「 台灣人公共事務會（FAPA）」嘅組織，仲話「我們尤其感謝FAPA一直對我的指導，令我們早前可以在美國進行有關《香港人權與民主法案》的游說工作」，廣男翻查公開資料就睇到，呢個FAPA 1982年喺美國成立，總部設於華盛頓，一直致力推動「台獨」。講到呢度，對於大專學界要「模仿、學習」啲乜，又做過乜，大家明喇！
廣男只係想奉勸一句，唔好再欲蓋彌彰、講咩「冇外部勢力插手」之類嘅鬼話喇！大家又不妨放長雙眼睇落去，「精彩劇情」可能仲會陸續有嚟。
原圖：中央社
請Follow我們的YouTube頻道：
下載我們的手機應用程式，收看第一手精彩內容：
評論