香港黑暴運動持續半年，近排囍雨同朋友傾開偈，講笑咁話如果有一份工，先唔好講人工有幾高，但就包括要經常要日曬雨淋、可能隨時有生命危險、或者別人辱罵，仲要隨時長時間OT（逾時工作），甚至屋企人都可能被人起底、欺凌，你願唔願意做？依家香港就有一份咁嘅工，叫警察。

盲反派為針對而針對

之所以講起呢段戲言，係因為囍雨見到新聞話今日立法會繼續討論公務員加薪，相關撥款包括警方逾時工作津貼；係過去半年，平均每月有1.1萬警員領取OT津貼，涉及開支共約9.5億港元。消息公佈後，惹嚟一眾盲反派強烈反對、圍攻，一時話要將「警察加薪」分拆出嚟獨立審議，一時又要求保安局局長及警務處處長到立法會交代；有啲撐黑暴網民仲發表意見話「要減警察人工」，警察係「筍工」，「表現差劣唔不應該領取OT」云云。囍雨想講，既然咁「筍」，你做唔做？點解係都要針對警察？

將心比心 誰想OT？

囍雨成日講，大家睇一件事，就算有唔同意見，起碼都應該公道啲、唔好畀啲盲反派政客誤導。老實講，對於加薪、津貼點計算，囍雨真係唔知，但有一點大家必須搞清楚，就係呢樣嘢唔係由警方掌握主導權、想要就有、要幾多有幾多。更何況大家要諗，將心比心，有冇人願意長時間OT？警察又點解需要OT先？咪就係過去半年，不斷有人暴動、犯法，到依家都未肯收手囉！其實睇呢件事嘅邏輯，同不斷有縱暴人士批評警方「亂放」催淚彈一樣，同樣唔由得警方「話事」，黑衣暴徒選擇係邊度犯法，警察就要係邊度執法！個道理好簡單：冇黑暴，警察使乜OT、又使乜津貼？冇黑暴，又使乜放催淚彈？

至於有人話警察表現差劣，囍雨覺得大家可以發表意見，甚至循機制去投訴，但所謂秉持公道，就係大家應該理性、客觀啲諗，「一竹篙打沉一船人」係咪合理呢？係咪因為主觀上有不滿，就否定嗮成個警隊嘅付出、貢獻呢？講真果句，依家好多市民都不滿某啲政府媒體機構或者部門，咁係咪又要好似對待警隊咁對待佢哋呢？

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app