日前喺上水有一名教師因為涉嫌管有鐵釘、電鑽、白電油等被捕，教育局翌日要求有關學校考慮暫停其職務，不少教育界人士紛紛為涉事教師護航，其中教育界議員葉建源更稱「會否是一種未審先判的做法，亦導致學校很大壓力。濫捕、濫告，現在的情況是非常嚴重。我們不可單憑拘捕或告上法庭這一點，就判決某一位人士有否做錯」。囍雨想問一句，將涉事教師停職，可以保障學校、老師同學生唔會被涉嫌違法教師影響，而且又唔係革佢職，呢個唔係對各方以至對社會都係最好安排咩？
葉建源圖包庇涉事老師？
葉建源對傳媒表示，「呼籲學校管理層考慮教師被捕個案時必須小心和持平，確保程序公義，包括無罪推定、有申辯機會、有尋求工會及法律意見的權利，以及有上訴權利等」，講真，囍雨都好同意大家要尊重無罪推定嘅原則，涉事教師一日未被裁定違法，大家都唔可以當佢有罪，但作為校方，需唔要需要顧及呢名教師有可能喺學校作出嘅行為？
囍雨咁講唔係話針對涉事教師，如果話擔心涉事教師都可能喺學校藏有電油、電鑽等武器，咁大家都未必信；但係，一個涉嫌違法嘅教師，會唔會更大機會影響到校內學生呢？例如將違法達義嘅思想灌輸俾學生，或者「指導」甚至帶埋啲學生去抗爭等等，學校先停佢職，對社會各方都好，如果法庭還涉事教師「清白」，咁該教師咪復職囉，囍雨唔認為先停涉事教師職有咩問題。再進一步，如果因為無罪推定原則而唔可以將涉嫌違法嘅教師停職，套用相同道理，係咪涉及性罪行同其他罪行嘅教師都唔應該被停職？道理好似講唔通喎！
應設專業失德教師名冊
綜觀囍雨睇到嘅報道，囍雨覺得好似「爭咁啲嘢」，就係好似見唔到葉建源評論教師涉嫌違法嘅真正問題，例如如果真係有老師非法藏有武器，應該予以譴責等等；當葉建源咁刻意去為涉事教師護航嘅時候，大家要問下呢位教育界議員，佢係咪都要譴責下近日嘅暴徒暴行先？講真，有教師失德、涉嫌違法係鐵一般事實，社會以至教育部門真係要考慮下，制訂教師失德及違法名冊，要求學校必須喺僱用教師時了解應徵人係咪喺名冊上，學生家長亦有權查閱名冊，令專業失德及被裁定違法嘅教師，知道做咗有違專業嘅事，係會被社會、教育界監察嘅！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論