早前台灣嘅總統蔡英文拒絕咗「香港大專學界國際事務代表團」（學界代表團）要求立《難民法》嘅要求後，其成員之一及浸會大學學生會長方仲賢就喺社交網站發文抨擊，話台灣「救援港人是必要之義務」，仲質疑民進黨「用香港人的鮮血來換取台灣人的選票」，言論一出隨即引嚟港、台兩地猛烈批評，方仲賢見「勢色不對」，昨日馬上發文「澄清」同道歉，仲話佢嘅原文畀人炒作、扭曲意思云云。廣男想同方仲賢講，一字一句都係你寫，的確無錯喎，仲點樣扭曲先？既然講得出，就應該唔怕認啦！

方仲賢及學界代表團發文道歉

面對住各方批評，方仲賢都要即刻「跪低」發文回應，「今天的我，打倒昨日的我」，又話唔認同「民進黨食香港抗爭者之人血饅頭」、「台灣人對香港民主運動抗爭之援助為理所當然」，仲話當日使用字眼失當，畀人借題發揮、扭曲佢嘅意思；之後學界代表團都要為方仲賢嘅言論道歉，仲話影響代表團名聲事小，「影響台港關係事大」，聲稱台灣人公共事務會（FAPA）一直係代表團嘅模仿對象，又多謝佢哋指導令到代表團可以喺美國遊說訂立《香港人權與民主法案》，台灣嘅付出和貢獻有目共睹云云。一句講哂，方仲賢同學界代表團都好似驚咗會得失台灣方面，就急急腳道歉。

方仲賢言論根本無被扭曲

廣男想講，方仲賢嘅所謂「澄清」都幾荒謬，話人哋扭曲咗佢意思，但係佢清清楚楚寫明，「如若民進黨只口講支持香港人抗爭，而無具體措施條文支持香港抗爭者，難免令人聯想到民進黨有只想用香港人嘅鮮血嚟換取台灣人嘅選票之嫌」，好明顯真係質疑緊人哋係食「人血饅頭」喎，其他人點「扭曲」佢意思？佢講得啱，佢或者唔係「直接」批評或者指控台灣，但呢個說法，好明顯質疑味道極濃，潛台詞係「你唔幫我又抽我水，唔係食人血饅頭係食緊咩」，點解自己講嘢得罪人，俾其他人抽秤，仲要反咬其他人「扭曲」佢說話呢？計廣男話齋，方仲賢講得出「又怕認」都算啦，做咩仲要扮「俾人屈」呀？

至於台灣方面，總統蔡英文一直講「台灣撐香港」，咁台灣係咪會接收香港嘅「暴徒」？廣男就覺得，有邊個地方會願意收留數以百計，甚至千計嘅激進分子，為自己地方製造「安全危機」呢？講得難聽啲，喺香港議題上，台灣民進黨都抽盡水架喇，如果喺呢個時候搞《難民法》，又會得罪返選民，大家認為民進黨會唔會咁做？廣男都係果句，好多嘢，由頭到尾只係一班香港嘅反政府人士一廂情願，而且甘心被人利用嘅啫！

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app