台灣當權者用港人鮮血換選票？香港示威者變成Condom（安全套，代表用完即棄）？呢啲香港示威者、激進派「依家先知」嘅事實，其他心清眼亮嘅香港市民一早都估到！近日浸大學生會會長方仲賢喺社交平台發文批評，話如果台灣嘅民進黨只口講支持港人抗爭，但又無具體措施條文支持「難免令人聯想到民進黨涉嫌只想用港人鮮血來換取台灣人選票」（方仲賢今日「缩咗」，就「人血饅頭」論澄清同致歉）。其實，政客從來都係先撈「政治油水」，繼而對被利用者「用完即棄」架啦，點解台灣當局要採取實際措施支援喺香港可能涉嫌暴動嘅「暴徒」？呢種搞完事去到其他地方「實有人照」嘅想法，會唔會太天真呢？
好天真、好傻嘅示威者！
對於呢個「全力抗爭」嘅學生會會長方仲賢，嚟到呢個時候先「醒覺」，廣男只能夠講佢「好天真、好傻」，其實早喺七、八月，一班喺7.1衝擊立法會嘅香港示威者就潛逃咗去台灣，但去到之後發覺原來台灣當局係無實際措施支援，做嘢又唔得，讀書又唔得，續簽證都要當一般旅客簽證咁做，甚至有意見稱其實台灣果邊有人質疑點解要收容喺香港搞抗爭示威嘅人，即係台灣方面尤其係民進黨一方面抽盡香港水，但另一方面又冷待到台灣嘅示威者。難聽啲講，由頭到尾只係一班香港示威者、激進派「自High」，覺得台灣係「自由天堂」，但人哋根本無諗過點處置佢哋！
如果大家理性啲諗件事，就會發現台灣方面咁做，其實係好正常。出於政治考量，「香港牌」幾乎已經係台灣嘅民進黨蔡英文最好嘅「宣傳牌」，如果有政治水都唔抽，好對唔住自己啫！但出於現實考量，一班喺香港「出事」而潛逃去台灣嘅人，可能係一班「暴徒」，台灣當局只要顧及下當地人嘅情緒，又點樣可以歡迎「暴徒嚟台灣定居」呢？所以無論香港班激進派或者個別台獨政客點樣爭取支援措施例如通過《難民法》，台灣根本唔會認真對待！
涉嫌違法者被政治逼害？
另一個方仲賢或者其他反政府人士提出嘅問題，就係佢哋不時聲稱要潛逃去台灣嘅人係喺香港受到「政治逼害」，廣男又想問下，幾時有人逼害過佢哋？如果佢哋唔係自己涉嫌違去，又做乜要「著草」去台灣呢？從頭到尾，係有人涉嫌違法，然後畏罪潛逃喎。講開又講，其實除咗台灣嘅民進黨之外，香港嘅盲反派政客，其實一樣對示威者「用完即棄」，區議會選舉前，一班盲反派政客「殺聲震天」，但選舉過後，啲政客除咗「循例地」遊行，好似有啲政黨仲搞緊慶功宴呀陰公！手足？齊上齊落？咪講笑啦！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論