繼上個月警方喺馬鞍山一間中學發現TATP炸彈後，警方噚日又喺灣仔華仁書院嘅地基發現一個以手提電話遙控引爆嘅土製炸彈，結構同10月喺旺角區發現嘅土製炸彈相似。囍雨喺度諗，點解不法之徒要將炸彈收埋喺學校一帶嘅山坡呢？如果發生爆炸，肯定會累及人數不少嘅師生甚至市民；更重要嘅題，係咪不法之徒打算用呢啲炸彈作為恐襲工具？當一而再、再而三發現炸彈，香港市民絕對唔可以扮無事，覺得香港依然「好和平」！
炸彈殺傷力可波及百米
根據警方消息，兩個炸彈為「功能完整」嘅遙控土製炸彈，合共有10包共重10公斤嘅一級同二級炸藥，並且有大量增加殺傷力嘅鐵釘，一旦引爆鐵釘隨爆炸威力飛出，殺傷力可達50米至100米，相信炸彈只有一個用途，就係用嚟殺害或者傷害人！
誠如警方估計，囍雨都相信有人專登將炸彈收藏喺比較「遠離人群」嘅地方，但囍雨要指出，學校山坡呢個收藏炸彈嘅地方，一啲都唔「偏僻」！朝早返工返學時間，人流車流密集，如果發生啲咩意外而令炸彈爆炸，師生、發現炸彈嘅清潔工甚至其他喺附近嘅途人，一樣有生命危險；所以放置炸彈喺學校範圍嘅人，根本就係自私、不負責任，完全置他人生死於不顧。
炸彈是恐襲工具？
其實喺今年10月，就有不法之徒喺旺角放置炸彈仲要引爆埋，今次警方又再發現炸彈，囍雨最擔心嘅問題，係有不法之徒想先收藏啲炸彈喺所謂「偏僻」地方，然後借機將炸彈搬到人多密集嘅地方例如市區或者示威區，隨時變成造成大量傷亡嘅恐怖襲擊。如果呢一日真係出現，咁香港就不可能再係安全城市，而係隨時隨地有人用炸彈、用槍「殺人」嘅「恐怖都市」。
種種表象顯示，炸彈、真槍係隨住「黑暴而來」，囍雨覺得無論大家有咩政治立場都好，反對暴力，尤其係反對致命暴力嘅原則應該係一致嘅；大家再唔叫停暴力，如果真係發生「炸彈」恐襲，到時大家點可以排除，被傷害、殺害嘅唔係自己同身邊人呢？叫停暴力同舉報懷疑犯罪行為，大家都有責任！
原圖：rthk、警方
請Follow我們的YouTube頻道：
下載我們的手機應用程式，收看第一手精彩內容：
評論