噚日民陣繼八月後再次舉辦大遊行，聲稱有數十萬名市民參與遊行，其召集人岑子杰表示「對遊行過程暢順和平感萬幸」；有遊行人士就表示「我覺得『和』『勇』同行，他們有他們做，我們有我們訴求。因為他們（政府）真的不理你的，如果很和平的行」。廣男想講，呢種「和理非」、勇武派各有各做嘅心態，即係「和理非」話俾人聽，「我哋就唔會衝架喇，但你去衝我會支持」，擺明就係包庇暴力，亦係香港到今日都唔能止暴制亂嘅根本原因！
和理非「支持」暴徒？
民陣岑子杰今早接受電台訪問，稱遊行過程「暢順和平」，對於刑事毁壞等行為，好似「睇唔到」咁，而對於有人喺法院放火，佢甚至稱「看不到示威人士有原因去破壞」，擺出一副「睇唔到」破壞行為嘅姿態；無論係政客、部分市民，呢種包庇暴力嘅態度，絕對令到暴徒更加有恃無恐。
廣男知道，對於部分反政府人士而言，佢哋一直「相信」因為有勇武派近月不斷將暴力升級，所以政府先會讓步撤回《逃犯條例》修訂，但大家要問下呢班所謂嘅「和理非」，佢哋支持勇武派，到底係支持到咩程度呢？噚日有暴徒打爛銀行、商舖，佢哋係咪支持？去法院放火，佢哋又係咪支持？如果佢哋都「支持」嘅話，大家又要問下佢哋，暴徒「私了」市民、襲擊警察甚至用磚頭擊斃老人家、淋汽油燒活人，佢哋係咪都要支持先？如果係嘅話，佢哋係支持暴徒殺人放火喎！
口講和平 實際借刀殺人
修例風波由六月發展到今日依然動亂不息，廣男之前已經講過，喺前線衝擊、打砸搶燒嘅係一小撮暴徒，而喺暴徒背後，係有一大班所謂「和理非」嘅人士或者政客支持佢哋，否則暴徒怯於民意，一早就已經收手！而噚日嘅遊行人士以至今早喺電台表達類似說法嘅市民，正正再次說明一樣嘢，就係「和理非」唔會同暴徒割席，甚至認為有暴徒「作亂」運動先可以持續落去。
繼續任由勇武派、暴徒打爛香港，香港只會陷入萬劫不復之地，「和理非」繼續支持暴徒，暴徒則繼續打砸搶燒，呢個惡性循環亦只會繼續落去。廣男坦白講，其實一班「和理非」，無論係市民定係政客，其實先係最虛偽嘅，自己唔衝，但鼓勵或默許人去衝，名符其實「精人出口」；而一班自認為有「光環」嘅暴徒，就因為部分人嘅「支持」甚至個別媒體嘅「英雄化」，就淪為政治爛頭卒。廣男相信，總有一日佢哋會因為被煽動上前線而後悔，可惜一切都難以挽回，包括佢哋對香港作出嘅傷害！
原圖：RTHK
請Follow我們的YouTube頻道：
下載我們的手機應用程式，收看第一手精彩內容：
評論